O Nobel de Química, para os autores do descubrimento e síntese dos puntos cuánticos

Os científicos Moungi G. Bawendi, Louis E. Brus e Alexei I. Ekimov son os gañadores do Premio Nobel de Química "polo descubrimento e síntese dos puntos cuánticos", segundo anunciou hoxe a Real Academia das Ciencias Sueca.

Estas partículas teñen propiedades únicas e agora difunden a súa luz desde pantallas e lámpadas LED e ademais teñen aplicacións en terreos como a bioquímica e a medicina, sinalou a academia sobre as investigacións do francés Bawendi, o estadounidense Brus e Ekimov, nacido na entón Unión Soviética.

Os puntos cuánticos "son unha parte importante da caixa de ferramentas da nanotecnoloxía. Todos os premios Nobel de Química 2023 foron pioneiros na exploración do nanomundo", destacou a academia ao explicar as razóns da concesión do galardón.

A institución lembrou que as partículas investigadas polos premiados están presentes na vida diaria de millóns de persoas en todo o mundo. "Catalizan reaccións químicas e a súa luz clara pode iluminar o tecido tumoral para un cirurxián", detallou a academia sueca como unha das súas aplicacións.

"Os investigadores utilizaron principalmente puntos cuánticos para crear luz coloreada. Cren que no futuro os puntos cuánticos poden contribuír á electrónica flexible, sensores minúsculos, células solares máis delgadas e talvez comunicación cuántica cifrada", destacou.

Foi en 1993 cando Bawendi (París, 1961) revolucionou os métodos de fabricación de puntos cuánticos, logrando que a súa calidade fóra extremadamente alta, un requisito previo vital para o seu uso na nanotecnoloxía actual.

Antes, a principios dos anos 1980, Brus (Cleveland, Estados Unidos, 1943) e Ekimov (nacido en 1945 na entón Unión Soviética) lograron crear -de maneira independente o un do outro- os puntos cuánticos, que son nanopartículas tan pequenas que os efectos cuánticos determinan as súas características.

Os nomes dos premiados deste ano foron filtrados unhas horas antes do anuncio oficial e publicados en varios medios suecos.

Bawendi, que interveu en directo vía telefónica na conferencia de prensa de anuncio dos galardóns, dixo que non soubera nada desa filtración. "Estaba a durmir e espertoume a Academia Sueca" cando o chamou por teléfono para anunciarlle o premio.

O novo Nobel sinalou que estaba "moi sorprendido" por este premio, que non esperaba, e recordou que neste campo de investigación hai moitos investigadores que contribuíron desde o principio, polo que nunca pensou que puidese ser el.

O Nobel de Química é o terceiro da rolda destes prestixiosos premios, despois de que o luns se anunciara o de Medicina e onte, martes, o de Física, á espera de que se coñezan entre o xoves e o luns o de Literatura, o da Paz e o de Economía.