O pazo de Meirás pecha desde este xoves para preparar a retirada de bens dos Franco

O pazo de Meirás pecha a partir deste xoves para preparar a retirada dos bens dos Franco que permite a Xustiza para partir do día 26.

O xulgado de primeira instancia número 1 da Coruña ditou en abril unha dilixencia de ordenación na que fixa ás 9:30 horas do 26 de xuño a entrega á familia Franco dos únicos bens do pazo de Meirás que a Audiencia Provincial da Coruña permitiulle retirar.

Será unha entrega que pode continuar durante os seguintes días hábiles e na que a Administración Xeral do Estado debe ter os bens localizados e identificados.

Refírese a aqueles elementos que, dentro da fase de execución da sentenza de 2020 que declarou que o inmoble é propiedade do Estado, a Xustiza entende que non están necesariamente incluídos no conxunto.

En concreto, son os anxelotes de bronce da capela, unha escultura pétrea dunha virxe cun neno, unha lámpada sobre unha pilastra dunha escaleira e tres apliques de parede metálicos, ademais das alfombras de corredor que xa estaban recoñecidas, todos eles no interior do pazo.

Por ese motivo, o Concello de Sada anunciou a suspensión das visitas, que xestiona por un convenio co Estado, por indicación de Patrimonio. Será así previsiblemente ata a segunda semana de xullo, aínda que depende da evolución xudicial.