Localizados en Mesía os corpos de dous veciños de Culleredo represaliados polo franquismo
Localizados en Mesía os corpos de dous veciños de Culleredo represaliados polo franquismo
José Galán Núñez e Manuel Ramiro Souto formaron parte da guerrilla antifranquista e foron asasinados por ese motivo no ano 1952
Procura dos corpos en Mesía (ARMH)
A Asociación para a Recuperación da Memoria Histórica (ARMH) localizou no cemiterio de San Martiño de Visantoña, en Mesía, os corpos de dous homes represaliados polo franquismo.
Trátase de José Galán Núñez e Manuel Ramiro Souto, nados na zona de Almeiras, en Culleredo. Ambos os dous formaron parte da guerrilla antifranquista e foron asasinados pola Garda Civil en xuño de 1952.
A ARMH foi a primeira que levou a cabo unha exhumación científica dunha fosa de vítimas da represión franquista, no ano 2000. Agora, e tras varios días de traballo desde o martes, comezaron a procura nunha fosa común de ambos os veciños de Culleredo.
Colaboración do Concello de Culleredo
En relación a este traballo de exhumación, o concello deste municipio coruñés trasladou a súa vontade de colaborar. O alcalde, José Ramón Rioboo, púxose ao dispor das familias "sempre que se confirme a identidade dos restos".
"Á falta de confirmación oficial sobre a orixe dos restos, e unha vez estean realizadas as comprobacións pertinentes, o goberno local anuncia que facilitará todos os trámites e procedementos que teñan que levar a cabo os familiares no caso de querer trasladar os restos mortais ao municipio de Culleredo".
Este proceso requiriría da autorización da Comunidade Autónoma e do Concello de Culleredo, de acordo aos regulamentos de Policía Sanitaria Mortuoria vixentes en Galicia, así como coa normativa local.
O alcalde de Culleredo, José Ramón Rioboo, sinala que "tanto por defender a súa honorabilidade como en apoio da Lei de Memoria Democrática, estaremos de lado das familias para prestarlles apoio nun proceso no que terán que intervir todas as administracións", remarca.
