O plan de Netanyahu para 'o día despois': unha Gaza sen armas, con seguridade israelí e sen UNRWA
O plan de Netanyahu para 'o día despois': unha Gaza sen armas, con seguridade israelí e sen UNRWA
Obxectivos a curto prazo: destruír as capacidades militares e a infraestrutura gobernamental tanto de Hamas como da Xihad Islámica, liberar os reféns e impedir que Gaza volva ser unha ameaza
Respecto á Administración civil e a orde pública, estarían reguladas por funcionarios locais con experiencia administrativa
¨Gaza será parte dun Estado palestino independente", responde Abás
![](https://img-g24-crtvg.flumotion.com/prog24/2024/20240223/rafah.png)
O primeiro ministro israelí, Benjamín Netanyahu, revelou onte á noite por primeira vez, e tras catro meses e medio de guerra en Gaza, o seu plan para 'o día despois' do conflito, no que detallou unha Franxa desmilitarizada, cuxa seguridade dependerá de Israel e na que non exista a UNRWA.
Nun documento, presentado a noite do xoves ante o gabinete de guerra para a súa aprobación e publicado hoxe pola Oficina do Primeiro Ministro, Netanyahu lembrou os obxectivos a curto prazo: destruír as capacidades militares e a infraestrutura gobernamental tanto de Hamás como da Xihad Islámica, liberar os reféns e impedir que Gaza volva ser unha ameaza.
A medio prazo, o mandatario anunciou unha Franxa onde Israel manterá a liberdade de operacións militares "sen límite de tempo", cun perímetro de seguridade na divisoria e o control israelí da fronteira entre Gaza e Exipto para evitar a reaparición de "elementos terroristas na Franxa de Gaza". "O Valado Sur funcionará, na medida do posible, en cooperación con Exipto e coa asistencia dos Estados Unidos, e basearase en medidas para impedir o contrabando procedente de Exipto, tanto subterráneo como aéreo, incluído o cruzamento de Rafah", detalla o documento.
Tamén, Israel di que manterá o control de seguridade sobre Cisxordania e Gaza, mentres que no enclave "haberá unha desmilitarización completa", mais alá do necesario para manter a orde pública. Respecto á Administración civil e a orde pública, estarían reguladas por funcionarios locais con experiencia administrativa afastados de "países ou entidades que apoien o terrorismo e non recibirán pago deles", di o documento, que anuncia un "programa integral" do que chama desradicalización das institucións relixiosas e educativas no enclave, coa axuda doutros países árabes.
A longo prazo, Netanyahu insistiu na negativa dun Estado palestino ou dos "ditados internacionais sobre un acordo permanente" e previu o fin da Axencia da ONU para os refuxiados (UNRWA), "cuxos axentes estiveron involucrados no masacre do 7 de outubro", repite o texto, a pesar da falta de probas concluíntes desde que Israel lanzara esta acusación sobre un grupo deles a finais de xaneiro.
"Israel traballará para deter as actividades da UNRWA na Franxa de Gaza e substituílas con axencias de axuda internacionais responsables", detalla o plan.
¨Gaza será parte dun Estado palestino independente", responde Abás
A Presidencia palestina, liderada por Mahmud Abás, asegurou este venres que non aceptarán unha Franxa de Gaza que non forme parte dun Estado palestino "con Xerusalén como a súa capital", en resposta ao plan de posguerra anunciado por Netanyahu no que vaticinou un enclave desmilitarizado, con seguridade israelí e administración civil palestina. “Gaza só será parte do Estado palestino independente con Xerusalén como o seu capital”, dixo hoxe nun comunicado Nabil Abu Rudeineh, portavoz do presidente palestino Abás.
"Calquera plan contrario está destinado ao fracaso", advírtese no texto, onde se denuncia que o plan de Netanyahu ten como obxectivo "perpetuar a ocupación israelí" dos territorios e "impedir o establecemento dun Estado palestino", o que, dixo, só traerá nova violencia e inestabilidade á rexión.
Pola súa banda, o Ministerio de Exteriores e Expatriados palestino criticou o plan de Netanyahu como unha estratexia para prolongar a guerra "xenocida" e manterse el mesmo no poder. Trátase "dun recoñecemento oficial da reocupación da Franxa de Gaza e a imposición do control israelí sobre ela", di o comunicado, que engade que tamén busca obstruír os esforzos estadounidenses e internacionais para a liberación de prisioneiros e reféns, a resolución do conflito e a encarnación dun Estado palestino.