O PP cre que o acordo PSOE-Sumar é "papel mollado"
O PP cre que o acordo PSOE-Sumar é "papel mollado"
Núñez Feijóo fala de "pirotecnia" para distraer a atención da amnistía
Podemos admite que non participou nas negociacións
UXT celebra que se dea o primeiro paso cara á investidura de Pedro Sánchez. Así valoraba o seu secretario xeral un acordo entre PSOE e Sumar, que contén cousas que lles gustan, aínda que boten outras en falla. E avisan de que eles son máis ambiciosos.
"O que coñecemos da proposta parécenos positivo, tendo en conta que para a UXT esta lexislatura debería ser a lexislatura das 35 horas semanais", dicía o seu secretario xeral Pepe Álvarez.
Máis fría foi a reacción dun dos socios de Sumar: Podemos cre que o acordo é inconcreto e admite que non participaron das negociacións. Irene Montero dixo: "Temos que ver o detalle do acordo. Cando o vexamos, poderemos facer unha avaliación".
O PP tacha a sinatura deste martes de teatralización e cre que o documento é papel mollado; di que non serve de nada sen o visto e prace de Puigdemont.
O líder popular Alberto Núñez Feijóo pedía: "Que non nos distraian coa súa pirotecnia e aclaren dunha vez aos españois o que queremos saber, como están as negociacións co independentismo catalán e a cambio de que están buscando os votos do independentismo catalán".
Tamén o PNV ten dúbidas pola posible invasión de competencias autonómicas dalgúns dos puntos contidos no acordo.
