O presidente Sánchez propón que os donos das redes sociais sexan responsables do que ocorre nelas

O presidente do Goberno, Pedro Sánchez, propuxo este mércores unha serie de medidas para loitar na Unión Europea contra a ameaza que considera que as redes sociais supoñen para a democracia, entre elas acabar co anonimato e que os propietarios sexan considerados responsables do que suceda nas súas redes.

Sánchez centrou a súa intervención ante o plenario do Foro Económico Mundial de Davos nese perigo e instou a "abrir os ollos" e adoptar decisións para evitar males que derivan delas, como a desinformación e as noticias falsas que, dixo, benefician os antisistema e os propietarios desas redes.

Ante iso, pediu unha fronte común e avanzou unha serie de medidas que vai propoñer ao resto de líderes da UE, entre elas poñer fin ao anonimato nas redes sociais e poder perseguir así a quen cometa delitos por esa vía.

Instará igualmente a que se faga cumprir a Lei de Servizos Dixitais da UE e que os propietarios das redes rendan contas se non cumpren coas normas establecidas.

Sánchez, alertou do perigo para a democracia que ao seu xuízo supoñen as redes sociais e expuxo unha "batalla" contra os seus propietarios aos que definiu como "tecnomultimillonarios", propoñendo varias medidas como a obrigación de render contas se non cumpren as normas e acabar co anonimato nas plataformas.

"Sei que non vai ser sinxelo, seino, estamos todos un pouco asustados porque as persoas ás que nos enfrontamos son moi poderosas, teñen recursos financeiros e tecnolóxicos case ilimitados, aliados moi perigosos e non están a xogar limpo", remarcou no Foro Económico Mundial en Davos (Suíza).

Sánchez di que estes empresarios non están a cumprir as normas morais nin se enfrontan ás consecuencias de incumprilas, pero mostrouse convencido de que sairá vitorioso desta disputa. "Sei que podemos gañar a batalla porque temos razón, porque somos máis e porque xa o fixemos no pasado", engadiu.

Deste xeito Sánchez continua o seu discurso contra o que recentemente definiu como "tecnocasta", en referencia aos donos das grandes compañías tecnolóxicas de Estados Unidos, que se aliñaron co novo presidente Donald Trump, investido esta mesma semana. En concreto, veu cargando contra o propietario de X, Elon Musk, agora á fronte do Departamento de Eficiencia Gobernamental da Casa Branca.

Este mércores Sánchez alertou dos efectos negativos das redes sociais "ocultos nos algoritmos", que en lugar de empoderar á xente acabaron nunha concentración de poder e riqueza "en mans duns poucos" e están "polarizando o debate público".

Apoio a Zelenski

Sánchez mantivo ademais un encontro co presidente ucraíno, Volodimir Zelenski, no marco do Foro Económico Mundial de Davos (Suíza), onde lle trasladou "o apoio de España fronte á agresión rusa".

Sánchez trasladou, nunha mensaxe en X, que conversou "sobre a marcha do proceso de adhesión de Ucraína á Unión Europea" e reitereille o apoio de España "fronte á agresión rusa".

"Os nosos principios son claros: non pode haber acordo sobre Ucraína sen Ucraína e non pode haber acordo sobre a seguridade europea sen Europa", escribiu o presidente do Goberno en redes sociais.

Nun comunicado, Zelenski agradeceu ao xefe do Executivo español a súa achega de 1.000 millóns de euros a Ucraína e espera que se manteña o mesmo nivel de axuda durante este ano.

O presidente ucraíno conversou con Sánchez sobre a situación nas zonas máis intensas da liña da fronte e das necesidades dos militares ucraínos no campo de batalla, especialmente en artillería e vehículos blindados.