O prezo da luz fulmina rexistros e supera este martes por primeira vez os 500 euros MWh
O prezo da luz fulmina rexistros e supera este martes por primeira vez os 500 euros MWh
A suba é de 102,4 euros con respecto o anterior máximo histórico de 442,88 euros/MWh, rexistrado hoxe
O prezo do gas disparouse un 200 % desde o inicio do conflito en Ucraína
![](https://img-g24-crtvg.flumotion.com/prog24/2022/20220118/factura_luz.png)
O prezo medio da electricidade no mercado almacenista, pool, subirá este martes un 23,15 % e marcará o seu rexistro máis caro da historia con 544,98 euros o megawatt/hora (MWh) á calor da alza no prezo do gas natural polo impacto da guerra en Ucraína. Por primeira vez na historia, supéranse os 500 euros por megawatt/hora (MWh).
Desta maneira, nese mercado almacenista, a suba é de 102,4 euros con respecto ao anterior máximo histórico de 442,88 euros/MWh, rexistrado hoxe, segundo datos publicados polo Operador do Mercado Ibérico de Enerxía (OMIE).
Por tramos horarios, o prezo máximo mañá rexistrarase entre as 19:00 e as 20:00, cando chegará a tocar os 700 euros/MWh, mentres que o mínimo será de 424,88 euros/MWh entre as 3:00 e as 4:00.
Os prezos do pool repercuten directamente na tarifa regulada -o denominado PVPC-, á que están acollidos case 11 millóns de consumidores no país, e serven de referencia para os outros 17 millóns que teñen contratado a súa subministración no mercado libre.
O barril de Brent rozou hoxe o seu máximo histórico. Disparouse un 20 % ao inicio da sesión, situándose preto dos 140 dólares. Dende o inicio da guerra, o petróleo de referencia en Europa escalou máis dun 30 %.
Na mesma liña, o gas tamén bateu hoxe todos os seus rexistros, chegando a 335 euros o megawatt/hora. Disparouse máis dun 200 % dende que comezou a guerra.