O proxecto Sensoxenoma logra 300 mostras de ADN para estudar os efectos da música nos xenes

"Oxalá que cheguemos ao punto de que o médico nos receite dez minutos de Brahms e unha sinfonía de Mozart en vez dun medicamento", di Baldur Drönnimann, director da Real Filharmonía de Galicia.

Os desexos do director da orquestra semellan a día de hoxe inalcanzables, pero o camiño iniciado polos investigadores Antonio Salas e Federico Martinón vai na mesma dirección.
Demostraron que a música xera unha expresión xenética diferente en pacientes con patoloxías neurodexenerativas que nas persoas sas. Agora queren ir un chanzo máis adiante no seu proxecto Sensoxenoma.

"Aínda é un pouco cedo para saber o impacto que van ter estas investigacións a efectos prácticos de tratamentos e terapias, pero empeza a haber resultados moi interesantes (que mesmo superan as nosas expectativas do inicio), que poderían axudar a entender eses efectos beneficiosos que se lle atribúen á música en pacientes con alzhéimer ou autismo".

"Nas persoas con enfermidades neurodexenerativas, o número de xenes que se modifican co estímulo da música é case o dobre do dunha persoa sa, e o que máis nos sorprendeu é que os xenes se estimulan dunha forma inversa á enfermidade, coma se tratasen de compensar a resposta anómala que ten pola enfermidade", afirma Federico Martinón, investigador principal de Sensoxenoma.

Esta tarde recolleron mostras de ADN, en sangue e da saliva dunhas 300 persoas do público en distintos momentos do recital.

"Agora que xa temos resultados, ademais de ter esta enorme resposta social, a ver se temos patrocinadores. De momento, só boas palabras, que agardamos que se concreten. Cremos que merece a pena, xa non é só un proxecto na fronteira do coñecemento, senón que é unha realidade que pode saír de Galicia para o mundo", engade Federico Martinón.