O proxecto Xenoma Galicia bota a andar coa análise do ADN de 2.000 persoas

O proxecto Xenoma Galicia bota a andar cunha proba para 2.000 persoas. Nela vanse analizar os marcadores de que poidan padecer tres enfermidades de carácter hereditario: cancro de mama e ovario, síndrome de Lynch ou hipercolesterolemia. 

Ademais deste cribado, que será aleatorio, os datos permiten iniciar o mapa xenético da comunidade que se irá completando nos próximos anos.

O proxecto Xenoma Galicia pretende recompilar nos próximos anos o ADN de 400.000 galegos, arredor dun 15 % da poboación, para coñecer as nosas predisposicións xenéticas e avanzar na prevención de enfermidades.

"O que imos facer é o estudo piloto e imos arrincar en breve, en canto poidamos crear a infraestrutura. Imos comezar coa captación de 1.000 participantes a través de mostra de saliva e 1.000 a través de sangue".

Nesta fase piloto a selección é aleatoria. Preténdese que todos os grupos poboacionais estean ben representados, rurais, urbanos, e de diferentes áreas sanitarias.

Os participantes, de entre 35 e 70 anos recibirán unha mensaxe do Servizo Galego de Saúde e poderán participar libremente e optar a coñecer os resultados da súa predisposición xenética a tres doenzas.

"A primeira aproximación da que lles imos devolver os resultados aos participantes é o resultado dun cribado de tres trastornos xenéticos que son a síndrome de cancro de mama e ovario hereditario, a hipercolesterolemia familiar hereditaria e a síndrome de Lynch, que tamén ten un risco alto de cancro de colon, endometrio e outros cancros. Os tres son trastornos xenéticos que xeran un risco elevado de desenvolver determinadas patoloxías. O que buscamos son variantes de risco de desenvolver estas enfermidades. Quere isto dicir que son diagnósticos? Non, quere dicir que os participantes que teñan algunha desas variantes xenéticas teñen un risco moito máis elevado de desenvolver esa enfermidade".

Os participantes recibirán os resultados e en caso de dar positivo serán remitidos ao sistema asistencial para valorar se hai signos da enfermidade e facerlle un seguimento.