O Sergas e Farmaindustria avogan por achegar os ensaios clínicos aos centros de saúde

Os centros sanitarios que realizan investigación biomédica teñen unha mellor atención aos pacientes. Con esta premisa, os servizos públicos de saúde e os responsables da industria farmacéutica avogan por estender os ensaios clínicos desde o ámbito hospitalario á Atención Primaria. Cren que así haberá máis equidade no acceso á innovación. 

Neste momento hai en España 4.000 estudos clínicos en marcha, e 170.000 persoas que participan neles de forma voluntaria. Os datos déronos na xornada de Farmaindustria, que avoga por estender a investigación ao ámbito dos centros de saúde, xa que ata agora se desenvolve principalmete nos institutos dos hospitais.

"Porque os pacientes son os principais beneficiarios destes ensaios, xa que grazas a eles poden acceder a tratamentos innovadores aínda non autorizados. E en certas patoloxías graves, cando os outros tratamentos xa fracasaron, isto pode significar ata a propia supervivencia", declarou Cristina Henríquez de Luna, a Vicepresidenta de Farmaindustria. 
 

"En Galicia hai 64 centros de saúde implicados en ensaios clínicos. Producimos aproximadamente o 10 % da investigación clínica en Atención Primaria deste país. Aspiramos a máis. Queremos ser un laboratorio deste tipo e cousas, porque cremos que ese laboratorio vai impactar positivamente nos nosos pacientes", explicou Antonio Gómez Caamaño, o conselleiro de Sanidade.

Na xornada da mañá interveu a encargada de avaliar os proxectos presentados ás bolsas do Instituto de Investigación Carlos III, que con fondos europeos reparten unha media de 700.000 euros por proxecto. Explicou que achegar a investigación á Atención Primaria favorece a equidade no acceso á innovación médica.