O PSdeG atribúe a suba do canon do lixo á mala xestión de Sogama

Sogama convocou mañá aos 295 concellos galegos que tratan alí os seus residuos domésticos para explicarlles o incremento que aplicará ao canon do lixo. Pasará de 56 a 66 euros por tonelada.

Dende a Sociedade Galega de Medio Ambiente culpan desta suba ao goberno central. Os socialistas galegos saíron ao paso destas declaracións e atribúen esta suba a unha mala xestión por parte de Sogama.

Paloma Castro, voceira de medioambiente do grupo parlamentario do PSdeG, dixo que o Goberno central o único que fixo foi traspoñer na lei de residuos unha directiva europea do ano 2018 que establece un imposto para a incineración e o vertedoiro porque entende que son medioambientalmente non recomendables.

Di que Sogama seguiu priorizando esas fórmulas de xestión e agora ten que asumir o custo do imposto que Isto xera.