O PSdeG avisa que tomará medidas tras desautorizar o pacto do Carballiño
O PSdeG avisa que tomará medidas tras desautorizar o pacto do Carballiño
O escrito prodúcese despois de que os grupos do PSOE e PP anunciasen un pacto para gobernar O Carballiño en coalición
![O líder do PSdeG José Ramón Gómez Besteiro durante un mitin (EFE/Cabalar)](https://img-g24-crtvg.flumotion.com/prog24/2024/20240618/besteiro-uno.jpg)
O PSdeG-PSOE advertiu de que o acordo alcanzado entre o Partido Popular e o Partido Socialista no concello do Carballiño (Ourense) "non" conta coa autorización do partido e, por tanto, avanzou que a executiva tomará "todas as medidas" previstas nos estatutos ante o ocorrido.
Tras coñecerse o acordo entre PP e PSOE do Carballiño, a dirección galega enviou un breve comunicado no que anuncia a adopción de medidas tras asegurar que o citado pacto "non conta coa autorización do Partido Socialista".
En caso de materializarse, o PSdeG anunciou que o grupo adoptará "todas as medidas previstas nos Estatutos e demais normativa do partido, con efecto sobre os concelleiros que desatendan o mandato dos órganos de dirección".
Este escrito prodúcese despois de que os grupos do PSOE e PP anunciasen un pacto para gobernar O Carballiño en coalición, que inclúe que os populares gobernen o último ano da lexislatura.
O acordo prevé unha repartición de áreas de goberno, "aínda por pechar", e os principais puntos programáticos a través dun "programa común" para garantir a "estabilidade" na localidade ourensá.
O consistorio tiña fixado para este mércores un pleno extraordinario para debater unha proposta exposta polo grupo de Vázquez, relativa a unha posible moción de censura ao goberno actual. Con este acordo, péchase a porta a unha eventual moción de censura ao goberno socialista.