O PSOE agarda que a reforma da lei do 'só si é si' sexa aprobada o 20 de abril

O PSOE confía en que a reforma do 'só si é si', que busca impedir rebaixar as penas aos agresores sexuais, poida ser aprobada definitivamente o 20 de abril no pleno do Congreso, a pesar de que este martes os socialistas accederon a aprazar o prazo para rexistrar emendas á lei.

O portavoz do PSOE no Congreso, Patxi López, argumentou que a súa formación apoiou prorrogar dúas semanas máis o prazo para rexistrar emendas parciais, ata o 10 de abril, debido a que non haberá actividade parlamentaria ata despois das vacacións de Semana Santa.

"Pero a intención é aprobar a lei o 20 de abril. Pódese facer que os prazos coincidan para que sexa o 20 de abril", indicou Patxi López.

A Mesa do Congreso, co apoio do PSOE e de Unidas Podemos, decidiu prorrogar o prazo destas emendas tal como solicitaran Unidas Podemos, ERC e EH Bildu para poder pactar as iniciativas e chegar a un acordo antes de convocarse o relatorio en comisión.

"Sempre houbo tempo e agora teñen aínda máis", dixo o portavoz parlamentario socialista que puntualizou que "agora fai falta coñecer se hai vontade de acordar". "Nós témola e seguimos abertos á negociación para arranxar o aspecto penal, outros grupos terán que dicir se o queren arranxar ou non", afirmou Patxi López.

O PP pide explicacións pola prórroga

Desde o Partido Popular, a súa portavoz parlamentaria, pídelle ao PSOE explicacións por acceder a prorrogar de novo o prazo para presentar emendas a petición dos seus socios de Goberno.

A portavoz do PP no Congreso, Cuca Gamarra, denunciou como "inadmisible" e "indecente" esta segunda prórroga nunha reforma tramitada con urxencia e que pretende evitar que a lei do 'só si é si' implique menores penas aos delincuentes sexuais.

O partido de Alberto Núñez Feijóo acusa o PSOE e o presidente do Goberno de engano e "hipocrisía" por aprobar a toma en consideración da reforma da lei na semana do 8 de marzo para despois deixala paralizada.