O rei Carlos III, a tratamento oncolóxico, reaparece na misa de Pascua

O rei Carlos III do Reino Unido asistiu este domingo coa raíña Camila ao servizo relixioso de Pascua na igrexa de San Xurxo do castelo de Windsor, no seu primeiro acto público desde que se anunciara o 5 de febreiro o seu diagnóstico de cancro.

O monarca, de 75 anos, saudou á multitude congregada ás portas do templo ao baixar do coche coa súa esposa, ambos os dous vestidos de escuro para a misa privada.

Outros membros da familia real asisten ao servizo, pero non os príncipes de Gales, Guillerme e Catarina, que tamén está a tratamento oncolóxico.

Esta é a primeira aparición ao aire libre e ante a cidadanía do rei, que tras divulgar a súa doenza se retirou da vida pública, aínda que mantén os seus labores de despacho.

A última vez que se viu en persoa foi o 4 de febreiro, cando os monarcas británicos foron a unha misa na igrexa da súa residencia campestre en Sandringham (leste de Inglaterra).

Fotos, vídeos e un audio

Desde entón, difundíronse fotografías e algún vídeo no que enviaba mensaxes ou realizaba tarefas oficiais. O xoves tamén publicou un audio co gallo do tradicional servizo relixioso do Royal Maundy, ao que foi soamente a súa esposa, Camila.

Entre as tarefas que o soberano segue acometendo en palacio inclúense investiduras ou entrega de credenciais ou as reunións semanais co primeiro ministro, Rishi Sunak, que se realizan en persoa cando é posible ou por teleconferencia.

Na súa aparición deste domingo, Carlos III amosouse riseiro e con aspecto tranquilo ao saudar á xente que se congregou desde horas antes para ver a comitiva real. Chegaron minutos antes a princesa Ana e o seu esposo, Timothy Laurence, os duques de Edimburgo e os de York.

Achegar confianza

Fontes de palacio indicaron antes do evento que a comparecencia do rei pretende achegar confianza sobre a súa situación, pero non significa que vaia retomar de momento os actos en público.

Carlos III accedeu ao trono tras a morte da súa nai o 8 de setembro de 2022 e foi coroado o 6 de maio do ano pasado.

O 5 de febreiro anunciou que padecía un cancro sen especificar, que fora detectado nas análises tras a súa operación en xaneiro por un agrandamento de próstata.