O rei insta a estar alerta e reflexionar para facer un uso responsable da IA

Os desafíos da intelixencia artificial na economía centran na Coruña o congreso de emprendedores CEDE. Dous mil directivos das empresas españolas máis representativas falan dos retos e as oportunidades que se abren para a economía tanto española como europea.

O encontro contou coa presenza do rei Filipe VI, que comezou a súa intervención cunha mensaxe de apoio aos directivos e executivos que se viron afectados pola DINA.

O rei agradeceu toda a axuda que desde o ámbito empresarial está a brindarse aos afectados e advertiu de que a reconstrución será "un proceso prolongado", polo que pediu seguir "apoiando en todo o posible" con este obxectivo e prepararse "para o futuro" ante acontecementos similares, tanto climatolóxicos como doutra natureza.

Sobre a intelixencia artificial, sinalou que é necesario "un liderado empresarial ético" para que estean "primeiro as persoas e logo, o demais" e considerou que en España están a darse "pasos moi positivos" para adaptarse a esta nova tecnoloxía, cun 9 % das empresas que xa adoptou o ano pasado solucións de IA.

O monarca instou a estar alerta e reflexionar para aproveitar "ben e a tempo" a intelixencia artificial (IA) como ferramenta estratéxica e fomentar o "uso responsable e ético das tecnoloxías que implica", o que esixirá "unha evolución normativa paralela".

A Xunta aprobará unha lei galega de intelixencia artificial

Pola súa banda, o presidente da Xunta, Alfonso Rueda, anunciou que "en poucas semanas" o Goberno galego aprobará o proxecto de lei de intelixencia artificial de Galicia, para garantir que "sempre o elemento humano" vai estar presente no uso desta tecnoloxía, que xa está implantada en moitos procesos da administración autonómica.

Destacou ámbitos como o sanitario, ou as oficinas de emprego, así como nas explotacións agrarias, e considerou que desde as administracións públicas hai que "aproveitar todas as vantaxes da intelixencia artificial, pero con sentidiño", como cre que se fai en Galicia, onde se atopa precisamente a Axencia Española de Supervisión da IA (Aesia), con sede na Coruña.

Rueda asegurou que a IA supón "un antes e un despois ao que non hai que terlle medo" porque se trata dunha "grande oportunidade para avanzar en calquera ámbito social", e non só interesa ao tecido produtivo senón a toda a sociedade, polo que nin as empresas nin as administracións poden "darlle as costas".

Os expertos sinalan a necesidade de investir en proxectos que melloren a vida das persoas e emprender unha revolución que beneficie a toda a sociedade. 

O presidente de Criteria Caixa e presidente da Fundación CEDE, Isidro Fainé, lanzou unha mensaxe humanista no ámbito do desenvolvemento dos retos tecnolóxicos como a intelixencia artificial (IA). "A era dixital non ten sentido se esquecemos darlle unha perspectiva humanística", afirma.

Durante a clausura do congreso, Fainé avisou de que "non se trata de competir contra os robots", senón de crear unha "sinerxia" para aproveitar o mellor de ambos os mundos.

Augura que o futuro do bo liderado "será cooperativo e non competitivo", "en absoluto autoritario". Para iso avoga por propiciar un intercambio interxeracional, no cal "dar protagonismo á xeración mellor preparada da historia".

Así, fixo un chamamento a España e a Europa a "investir en todas as áreas de coñecemento" e aproveitar unha "xeración de talento tan bo", co "gran desafío" de "poñer a España no mapa mundial da tecnoloxía".

Os exemplos de Telefónica e Naturgy

Durante a xornada, o presidente de Telefónica, José María Álvarez-Pallete, e o de Naturgy, Francisco Reynés, manifestaron que a intelixencia artificial supuxo "un cambio de paradigma" en todos os sectores, e a ven como a oportunidade de avanzar e innovar.

O presidente de Telefónica, compañía que celebra 100 anos de historia, sinalou que a revolución tecnolóxica que é, máis ben, "unha revolución estrutural", sucede "moi rápido cun gran impacto", algo que tamén notou o seu sector. "Tivemos que cambiar a rede de cobre a fibra e sementar as bases dos próximos anos", indicou.

Desde Telefónica notaron un "incremento do tráfico de datos permanente", para o que tiveron que "planificar as redes para que cursen entre un 30 % e un 40 % de datos máis cada ano".

No caso de Naturgy, o uso da intelixencia artificial céntrase en tres grandes grupos: a prevención e seguridade, os clientes e os empregados.

Con todo, o seu presidente avisou de que "un gran poder implica unha gran responsabilidade", polo que é necesario contar cunha regulación e abordala desde un punto de vista ético.