O Foro Económico de Galicia analiza o impacto da IA no sistema de saúde
O Foro Económico de Galicia analiza o impacto da IA no sistema de saúde
A medicina preditiva e personalizada precisa deseño de algoritmos e capacidade de procesamento para adiantar os diagnósticos
Algoritmos ben adestrados, que sexan quen de conectar cantidades enormes de datos para poder diagnosticar enfermidades graves mesmo antes de que aparezan os síntomas. A medicina preventiva e personalizada, a medicina do futuro, é imposible sen intelixencia artificial. Por iso, todos os sectores implicados no seu desenvolvemnento reúnense hoxe en Santiago para impulsar o seu avance no sistema sanitario galego.
Como os avances en biotecnoloxía ou a evolución das técnicas diagnósticas de imaxe, o uso da intelixencia artificial para o procesamento de datos está a supoñer unha revolución na práctica clínica.
"Cando imos a calquera tipo de consultas, estamos ingresados en unidades especializadas, de vixilancia intensiva, todo son cacharros; e é tal a cantidade de datos e tal o seu volume que ou temos máquinas ou é imposible para as persoas extraer desa inxente cantidade de datos a información que permita afinar diagnósticos ou mesmo intervir a tempo para evitar enfermidades derivadas dos nosos hábitos ou do noso código xenético", explicou Senén Barro, o director do Citius de Santiago.
"Estas ferramentas de IA vannos permitir coñecer mellor as características e condicións individuais dos pacientes, e pasaremos dunha medicina reactiva, de actuar cando un ten unha enfermidade, a poder facer unha medicina máis preditiva e preventiva, adiantándonos á aparición dos síntomas", dixo Carlos Pena Gil, cardiólogo no CHUS
É a primeira vez que o Foro Económico de Galicia trata sobre as oportunidades da intelixencia artificial no sistema sanitario galego. Están implicados desde os matemáticos que desenvolven os algoritmos, os investigadores e as empresas. Un ecosistema que precisa políticas públicas, máis formación e marcos legais axeitados para non quedar atrás no que será un novo paradigma no coidado da saúde.
"O cambio xa está e vai ser continuo. O que se chama medicina personalizada, ou se fai con intelixencia artificial ou non se fai", declarou Senén Barro, o director do Citius de Santiago.
