O rei nos Premios Princesa de Asturias: "A guerra nunca vai destruír a cultura"
O rei nos Premios Princesa de Asturias: "A guerra nunca vai destruír a cultura"
Unha gala marcada polos desafíos que afronta o mundo
Cheo completo, convidados sen máscara e banda de gaitas para recibir os reis, a princesa Leonor e a infanta Sofía no Teatro Campoamor de Oviedo. A gala da cuadraxésimo segunda edición dos Premios Princesa de Asturias recuperou todo o seu esplendor.
Pero foi unha cerimonia marcada polo contexto internacional e a guerra de Ucraína. O rei Filipe apelou a preservar a consolidación da Unión Europea nun momento crucial.
"Pero a guerra nunca vai destruír a cultura nin os valores que representa, como tampouco a liberdade e a dignidade dos seres humanos, uns valores que tamén representa Europa", dixo Filipe VI.
Referencias tamén nos discursos dos galardoados. O Premio de Comunicación e Humanidades, o xornalista polaco Adam Michnik reclamou liberdade e verdade fronte á "malvada guerra" de Putin.
O arqueológo mexicano Eduardo Matos Moctezuma dixo que a historía é implacable e non se pode manipular.
A premio de Cooperación Internacional, Ellen MacArthur, impulsora da economía circular, instou a loitar por un planeta saudable.
E as galardoadas co Premio das Artes, a coreógrafa María Pagés e a cantadora Carmen Linares deixaron unha mostra do seu facer no escenario do teatro.
A princesa de Asturias animou a xente nova a manter o entusiasmo e esforzarse.
"A mellor maneira de progresar pasa por manter o entusiasmo e por coñecer, equiparnos con responsabilidade e capacidade de esforzo e aprender dos que saben", apuntou no seu discurso.
A piques de facer 17 anos, destacou todo o que lle achegan os galardoados no seu crecemento persoal.
Todos os galardoados abandonaron o Teatro Campoamor entre os aplausos do público e o son das gaitas.
