O Seprona desmente un suposto caso de maltrato animal en Betanzos

A mobilización da asociación Perros Invisibles para denunciar un suposto caso de maltrato animal en Betanzos ten sorprendida a veciñanza. A asociación comezou a campaña en redes sociais para protestar polo estado de Orque, un can que -din- viviría encadeado, á intemperie e mal alimentado dende hai anos. 

A protesta da asociación foi un paso máis aló, e ducias de simpatizantes concentráronse ás portas da casa de Orque para pedir a custodia do can. Houbo algún momento de tensión, e mesmo hai quen di que recibiu ameazas. 

E o caso é que tanto os informes do Seprona como da Policía Local contradín a versión denunciada pola asociación animalista. Indican que, se ben é un animal de idade avanzada e cunha enfermidade grave, está tratado e controlado nunha clínica veterinaria.

Tampouco detectaron síntomas de desnutrición nin puideron constatar que o can durma fóra, senón no interior da vivenda. E acreditan que Orque leva microchip dende 2012, desmentindo outro dos aspectos denunciados pola asociación nas súas redes sociais.

Por todo iso, dende o Concello entenden que os donos de Orque están lexitimados para manter a custodia do can. Parece que agora podería ser esta familia a que interpuxese denuncia contra a asociación por entrar na súa propiedade sen permiso e, din, tentar roubar o can.