O Supremo arquiva a investigación contra Puigdemont por terrorismo

A maxistrada do Tribunal Supremo Susana Polo arquivou este martes a investigación contra o expresident catalán Carles Puigdemont e o deputado de ERC Rubén Wagensberg polos seus vínculos coa organización Tsunami Democràtic.

A maxistrada adoptou esta decisión tras recibir o auto polo que o xuíz da Audiencia Nacional Manuel García Castellón arquivou a causa de Tsunami Democràtic, despois de que a Sala do Penal invalidase todas as dilixencias acordadas polo instrutor nos últimos tres anos porque o xulgado prorrogou a investigación o 30 de xullo de 2021, 24 horas fóra de prazo.

A maxistrada sinala que antes desa data, que é o límite temporal para realizar dilixencias de investigación segundo o acordado pola Audiencia Nacional, "non levou a efecto ningunha investigación da causa determinante da participación dos investigados nos feitos que se lle imputan", como así se desprende do auto de arquivo ditado por García Castellón.

Ademais, explica que no devandito auto "consta que non se acordou nin tomou declaración a ningún dos investigados, tampouco tivo lugar a dos aforados na presente causa, o cal impide que as actuacións poidan continuar polos trámites do procedemento abreviado". 

Tras a decisión este luns de García Castellón, as reaccións sucedéronse. Este mesmo martes, Marta Rovira, secretaria xeral de Esquerra Republicana, instalada en Suíza desde 2018 para evitar a xustiza, asegurou que posiblemente este sábado estea xa en Barcelona, unha vez que non pesaba sobre ela esa ameaza. O arquivo por parte do Supremo esta mañá podería acabar por aclarar a súa situación.

Tamén podería volver o vicepresidente de Òmnium Cultural Oleguer Serra, quen tamén está en Suíza e figuraba entre os dez investigados polo xuíz da Audiencia Nacional.

O Goberno cre que a lei de Amnistía enceta camiño

Para o Goberno, estas e outras actuacións da Xustiza demostran que a lei de Amnistía enceta camiño. Asegurouno a voceira do Goberno, Pilar Alegría, na conferencia de prensa posterior ao Consello de Ministros ao ser preguntada o polo arquivo da causa de Tsunami Democràtic.

"Claramente a lei de amnistía enceta camiño e aplícase e aplicarase con total normalidade, que é o que ten e tiña que pasar", reiterou.

Non obstante, o horizonte aínda non está despexado para Carles Puigdemont e para outros dos acusados e condenados polo Supremo no caso do procés. Polo momento, o Alto Tribunal non lle aplica a amnistía ao expresdidente catalán xa que mantén contra el a acusación de malversación e a orde de arresto.

Ademais, o xuíz que investiga a suposta inxerencia rusa no movemento independentista catalán rexeitou amnistiar a Puigdemont e envía o caso ao Tribunal Supremo, solicitando que o investiguen por delitos de traizón, malversación e organización criminal. 

A pesar de que a Audiencia de Barcelona lle ordenou pechar en maio pasado a causa sobre esa suposta inxerencia rusa, porque a prorrogaba sen xustificación, Aguirre abriu en xuño unha nova peza separada no caso Volhov en que apuntou entre outros contra os expresidentes da Generalitat Artur Mas e Carles Puigdemont e o deputado de Junts Francesc de Dalmases.