O Supremo xulgará o exceso de velocidade de Baltar pola súa condición de aforado
O Supremo xulgará o exceso de velocidade de Baltar pola súa condición de aforado
O Xulgado do Penal de Zamora, que ata agora levaba a causa contra o expresidente da Deputación de Ourense, inhibiuse en favor do Alto Tribunal, por ser agora senador
Manuel Baltar (EFE/Brais Lorenzo)
O Tribunal Supremo será o encargado de xulgar o delito contra a seguridade viaria supostamente cometido polo expresidente da Deputación de Ourense José Manuel Baltar Blanco, ao inhibirse o Xulgado do Penal de Zamora en favor do Alto Tribunal polo aforamento de Baltar ao ser nomeado senador, informaron este xoves fontes do TSXCeL.
Desta forma, será o Supremo o encargado de dirimir se é delito o exceso de velocidade detectado por un radar que determinou que o entón máximo responsable da Corporación provincial ourensá circulaba a 215 quilómetros por hora o pasado mes de abril nun tramo da autovía A-52 á altura da comarca zamorana de Seabra limitado a 120 quilómetros por hora.
O Xulgado do Penal de Zamora emitiu un auto polo que se inhibe en favor do Supremo, nunha resolución contra a que as partes poden interpoñer recurso de apelación no prazo de cinco días.
Inicialmente, Baltar ía ser xulgado no Xulgado de Instrución da Pobra de Seabra mediante xuízo rápido, pero nunha primeira ocasión este suspendeuse por incomparecencia do seu avogado e a segunda vez porque rexeitou conformarse coas penas solicitadas polo Ministerio Fiscal, ao entender que non cometera delito, polo que o caso pasou a mans do Xulgado do Penal de Zamora.
O exceso de velocidade produciuse cando Baltar conducía o seu propio coche oficial como presidente da Deputación de Ourense.
