A xuíza do Supremo propón solicitar suplicatorio para xulgar a Baltar
A xuíza do Supremo propón solicitar suplicatorio para xulgar a Baltar
A maxistrada Ana Ferrer ve indicios dun delito contra a seguridade do tráfico
![](https://img-g24-crtvg.flumotion.com/prog24/2023/20231219/colBALTARDECLARANOSUPREMO_frame_30.png)
A maxistrada do Tribunal Supremo Ana Ferrer elevou unha exposición razoada á Sala Segunda na que propón solicitar un suplicatorio ao Senado para suspender a inmunidade e proceder penalmente contra o senador do PP e expresidente da Deputación de Ourense, Manuel Baltar, ao apreciar indicios dun presunto delito contra a seguridade viaria por conducir a 215 quilómetros por hora.
A instrutora adoptou esta decisión despois de que o pasado febreiro rexeitase a petición do senador de anular a causa penal polo feito de ser multado previamente en vía administrativa por un exceso de velocidade.
Cabe lembrar que o Supremo abriu causa o pasado novembro, despois de que a Sala do Penal recibise o testemuño de xuízo rápido e as dilixencias urxentes remitidos polos xulgados de Zamora e Pobra de Seabra, incoadas en virtude de atestado da Garda Civil pola comisión dun suposto delito contra a seguridade viaria.
No mes de decembro pasado, Baltar declarou ante o Supremo, logo dun aprazamento, e negou que conducise a máis de 200 quilómetros por hora. Amais insistiu en que os feitos xa foran resoltos ao pagar a sanción de tráfico que lle puxeran sen facer alegacións.
Seis meses de multa
Antes de que o caso chegase ao Supremo, o Ministerio Fiscal presentara escrito de acusación contra Baltar considerándoo autor dun delito contra a seguridade viaria, na modalidade de condución de vehículos de motor a velocidade superior á legalmente permitida do artigo 379.1 do Código penal.
A Fiscalía pediu unha pena de seis meses de multa a razón de cota diaria de 10 euros, coa responsabilidade persoal subsidiaria que en caso de falta de pagamento establece o artigo 53 do Código penal e 1 ano e 1 día de privación do dereito para conducir vehículos de motor e ciclomotores.
O xulgado de instrución, de conformidade co prevido no artigo 800.1 da Lei de Axuizamento Criminal, acordara a apertura do xuízo oral contra Baltar por feitos supostamente constitutivos dun delito de condución de velocidade notoriamente superior ao Regulamento O 15/2007.
Pero, acreditada a condición de senador designado polo Parlamento de Galicia, o Xulgado do Penal Número 1 de Zamora, por auto de data 13 de setembro de 2023, acordou a inhibición e remisión das actuacións ao Supremo.
A 215 quilómetros por hora
Os feitos remóntanse ao domingo 23 de abril, cando Baltar foi interceptado, segundo o informe definitivo da Garda Civil de Tráfico, a 215 quilómetros por hora na A-52, ao seu paso por Asturianos, ao volante dun coche da Deputación de Ourense. Pouco despois sóubose que ese mesmo día fora detectado por outro radar na Autovía das Rías Baixas a 173 quilómetros por hora.
Tres meses despois de que se coñecese a noticia, Baltar foi elixido senador por designación autonómica a proposta do PP, o pasado 28 de xullo.
Transcorrera apenas un mes desde que Baltar renunciou a seguir á fronte da Deputación provincial tras 11 anos. Despois de non lograr a maioría absoluta na corporación provincial nas eleccións do 28 de maio, buscou así facilitar que o seu partido puidese conservala, segundo afirmou el mesmo.
A renuncia de Baltar permitiu un cambio de ciclo na institución provincial e no PP en Ourense, despois de máis de tres décadas ligadas ao seu apelido, primeiro da man do seu pai, José Luis Baltar, e despois baixo o seu mandato. Agora preside a institución provincial e a xestora do PP en Ourense o alcalde do Pereiro de Aguiar, Luis Menor, da órbita de confianza da dirección galega do partido.