O Vizconde de Eza parte cara a Terra Nova para facer prospeccións pesqueiras
O Vizconde de Eza parte cara a Terra Nova para facer prospeccións pesqueiras
O buque oceanográfico traballará na zona onde afundiu o Villa de Pitanxo
As familias das vítimas pedían que transportase medios para baixar á embarcación
O oceanográfico Vizconde de Eza, dependente da Secretaría Xeral de Pesca, partiu este domingo dende Vigo cara a Terra Nova para facer prospeccións pesqueiras na mesma zona onde se afundiu o Villa de Pitanxo.
A súa marcha provocou o enfado das familias da tripulación que reclamaban que se aproveitase a viaxe para transportar medios tecnolóxicos que permitan baixar ao barco afundido.
Segundo explicou este sábado o delegado do Goberno, José Miñones, o buque non está adaptado para facer ese cargamento.
"Poderiamos poñer en perigo a propia tripulación e ninguén quere iso. (...). Respectemos os tempos das investigacións, os técnicos e os xulgados. Serán os responsables da investigación os que nos digan o que temos que facer", apuntou.
O delegado do Goberno pediu "non politizar" máis o caso tras a concentración protagonizada polas familias das vítimas no Náutico de Vigo. A súa voceira, María José do Pazo, cualificou de "inadmisible" o envío do buque nesas condicións e a falla de información.
