O xiro español sobre o Sáhara abre outra crise no Executivo e crea incerteza na relación con Alxeria

O ministro de Asuntos Exteriores dará explicacións no Senado e no Congreso sobre a decisión de apoiar a proposta marroquí para o Sáhara Occidental. A revisión unilateral da postura española enfada os socios de Pedro Sánchez, que non foron informados do xiro.

A vicepresidenta segunda descarta unha ruptura no Goberno, pero fala de opacidade e esixe explicacións. 

"Teño unha conversa pendente co presidente do Goberno. Quen cambiou de posición, cunha enorme opacidade, foi o Partido Socialista", di Yolanda Díaz.

Os socialistas din que non hai xiros, senón solucións a un problema enquistado. 

"A diplomacia require de discreción, e iso é o que se mantivo este tempo", defende o voceiro da Executiva do PSOE.

O cambio de posición do Executivo causa malestar en todo o arco parlamentario, que lle pide explicacións ao presidente. O PP critica o xiro inesperado, sen medir as consecuencias. 

"Rompeuse o consenso en política exterior que España construíra nos últimos 40 anos. Nunca vin en tres ou catro días cometer tantos erros", critica Alberto Núñez Feijóo.

A carta de Pedro Sánchez a Mohamed VI defende a proposta marroquí como a "base máis seria, creíble e realista" para solucionar o contencioso do Sáhara. Son os mesmos termos en que se pronunciou Washington hai 15 días. A ONU reivindica que o conflito debe resolverse baixo a súas pautas, e o Polisario critica a  postura de España. "Pon en perigo a estabilidade no norte de África e complica a solución do conflito do Sáhara Occidental".

O cambio de postura resolve a crise diplomática con Marrocos, clave para o control da inmigración irregular. A embaixadora marroquí regresaba a Madrid tras case un ano de ausencia. Pero o movemento supón á vez un revés na relación con Alxeria, valedora dos saharauís, que chamou a consultas o seu embaixador. O país é un socio estratéxico en materia enerxética: ata febreiro foi o principal provedor de gas de España, co 40 por cento.