O xuízo polo asasinato de Samuel Luiz comezará o 16 de outubro

Trinta testemuñas presenciais declararán no xuízo sobre o asasinato de Samuel Luiz que vai comezar o próximo 16 de outubro.

O Tribunal Superior de Xustiza de Galicia comunicou este mércores o calendario completo do proceso, con tribunal do xurado.

O xurado constituirase o 15 de outubro e o proceso empezará ao día seguinte cos informes e as cuestións previas, aínda que os dous primeiros acusados en declarar, Alejandro Míguez e Catherine Silva, farano o xoves 17 de outubro.

A partir de aí, empezarán as testificais, con 42 persoas chamadas a declarar no proceso, entre elas os pais da vítima, que reclaman indemnizacións por secuelas psicolóxicas, e os dous menores xa condenados.

Entre todos estes, 30 persoas estiveron no lugar dos feitos cando se produciron, polo que darán testemuño do vivido.

De entre todos, 18 son alleos ao ocorrido, pois non coñecían nin á vítima nin aos supostos agresores e tampouco se viron implicados, mentres que outros dous son os senegaleses que auxiliaron o asasinado -que están nun proceso á marxe por lesións- e os demais teñen relación coas partes.

Será o 30 de outubro cando empecen as probas técnicas, cos axentes da Policía Nacional e os diferentes peritos.

O 5 de novembro declarará o médico de urxencias que atendeu ao falecido e os dous médicos forenses encargados da autopsia, mentres que os dous días seguintes valoraranse as secuelas psicolóxicas na familia da vítima.

O 8 de novembro abordarase a presenza de ADN dos acusados no corpo do asasinado e o día 12 o xuízo centrarase na identificación dos procesados no lugar dos feitos a través das cámaras de vixilancia da zona.

Por último, de acordo ao calendario, o 14 de novembro declararán os outros tres acusados: Diego Montaña, Alejandro Freire 'Yumba' e Kaio Amaral Silva, antes dos informes e a última palabra do día 15 e a entrega do obxecto do veredicto o luns 18.

A Fiscalía pide 25 anos de prisión para Diego Montaña e Catherine Silva, ao consideralos autores dun asasinato con aleivosía e ensañamento co agravante de discriminación sexual.

Esta última circunstancia non a ve nin en Alejandro Freire nin en Alejandro Míguez, para os que solicita 22 anos, nin tampouco en Kaio Amaral Silva, para quen pide 27, pois engádelle o roubo do móbil da vítima.

Os nove membros do xurado deberán dar resposta a 87 cuestións, xunto con outras 7 sobre o grao de execución do delito e a participación dos cinco acusados, como a determinación de se se tratou dun asasinato a nivel xurídico.

No caso están presentados a Fiscalía, as defensas de cada acusado, a acusación particular da familia da vítima e a acusación particular que exerce o colectivo de defensa do dereitos LGTB Ás A Coruña.

Causa da morte: cúmulo de golpes

As defensas non se conformaron no seu momento cunha única autopsia e pediron unha segunda, pero a conclusión foi idéntica: a causa da morte foi un cúmulo de golpes.

Isto será un eixe central durante o proceso, pois a Fiscalía sosterá que os catro homes provocaron as lesións e, por tanto, a autoría do asasinato é compartida, canda a da muller como suposta instigadora.

As defensas, en cambio, buscan expor ao xurado a dúbida sobre o ocorrido con cada un dos acusados, ao argumentar que é necesario demostrar quen deu cada golpe e cal ou cales foron de maior gravidade e mortais.

Homosexualidade: agravante a demostrar

A Fiscalía pensa que no crime se produciu unha circunstancia modificativa da responsabilidade penal que a agrava: o feito de que un dos agresores e a súa noiva actuasen movidos pola "súa animadversión cara á orientación sexual homosexual que lle atribuíron á vítima".

Trátase dun factor que desde aquela noite está en boca das testemuñas, que apuntan a berros homófobos previos á malleira.

Tamén hai unha circunstancia que podería atenuar ou eliminar a responsabilidade penal de tres deles, que terán que demostrar, pois aseguraron que se atopaban baixo os efectos do alcol.

Un dos acusados ten pendente, ademais, un delito de roubo con violencia, cunha petición de 5 anos máis de cárcere, ao roubarlle supostamente o móbil á vítima, aínda que na instrución dixo que o atopou.

A maxistrada presidenta do tribunal do xurado decretou que procede admitir as probas propostas polas partes nos seus respectivos escritos de acusación e defensa, fóra dos informes policiais de visionado de imaxes e da chamada infografía forense coa correspondente reportaxe videográfica, tal como determinara en maio o TSXG. 

O asasinato do mozo de 24 anos Samuel Luiz ocorreu o 3 de xullo de 2021 na Coruña. No caso hai dous menores xa condenados e cinco maiores de idade en prisión provisional e pendentes de sentenza.