Orange e MásMóvil: unha fusión con condicións, por Maite Cancelo

A Comisión Europea acaba de dar o visto e prace, iso si, con condicións, á fusión entre Orange España e MásMóvil, un proceso que empezou xa hai dous anos, cando o 8 de marzo de 2022 ambas as compañías confirmaban publicamente que iniciaran negociacións para combinar os seus negocios en España e que, de saír a operación adiante, nacería unha joint venture controlada ao 50 % por as dúas telecos, cunha valoración inicial da empresa resultante de 18.600 millóns de euros. Ambas as empresas buscaban reforzar a súa posición no mercado español, ao reducir o número de competidores, polo que os seus principais rivais, Telefónica e Vodafone, tamén a defenderon desde o principio.

Dada a dimensión da operación e o sector afectado (telecomunicacións), son as autoridades de competencia europeas as encargadas de supervisala, darlle a aprobación e, mesmo, adoptar unha decisión sobre as concesións que Orange e MásMóvil deberían outorgar a un terceiro (as chamadas remedies) para evitar problemas de competencia no espazo económico europeo e, máis concretamente, no español, que poderían afectar ós prezos (que poderían aumentar) ou á calidade do servizo e á conectividade.

Por iso, a decisión da Comisión Europea foi a de aprobar a operación, pero co condicionante (remedie) de ceder parte do seu negocio á operadora romanesa Digi, unha oferta proposta no pasado mes de decembro por Orange e MásMóvil para obteren o beneplácito de Europa.

Como queda o sector en España e a súa supervisión?

Despois da fusión, temos como a empresa resultante desta joint venture pasará a ser, segundo as propias palabras da Comisión Europea, o primeiro operador en número de clientes no mercado español, desprazando a Telefónica desa posición, cuns ingresos estimados de máis de sete mil millóns de euros.

Por outra banda, Digi, o operador que máis estaba a crecer no mercado español tanto en abonados como en ingresos polas súas tarifas de baixo custo, grazas ao acordo comprará dúas bandas de frecuencia media e unha alta que lle permitirán crear a súa propia rede de telecomunicacións, xa que ata o de agora, ao non dispoñer de ningunha en España, tiña que alugala a Telefónica por 300 millóns, polo que non hai dúbida de que é un dos grandes beneficiados pola operación.

En calquera caso, á marxe de que esta fusión foi supervisada polas autoridades de competencia europeas, o seu seguimento seguro que será exercido pola Comisión Nacional dos Mercados e a Competencia (CNMC), que ten, entre os seus ámbitos de actuación, a vixilancia do correcto funcionamento dos mercados das comunicacións electrónicas a través do establecemento e supervisión do cumprimento das obrigacións polos operadores e a resolución dos conflitos entre os axentes no mercado. Entre as súas funcións tamén se realiza periodicamente unha análise do nivel de competencia destes mercados co obxectivo de valorar se é necesario impoñer obrigacións reguladoras específicas.

En resumo, é unha fusión con claros gañadores, supervisada polas autoridades de competencia europeas, que fixaron condicións para a súa validación co obxecto de que non se producisen os efectos adversos dunha redución de competencia e con, seguro, un seguimento por parte da propia CNMC, dadas as súas funcións de supervisión e control deste sector económico.