Os agricultores levantan as protestas que bloqueaban as fronteiras con Francia
Os agricultores levantan as protestas que bloqueaban as fronteiras con Francia
Os tractores permaneceron durante 24 horas impedindo o tránsito nos principais pasos froiteiros, incluído a AP-7 na Jonquera entre Cataluña e o sur francés
En Euskadi as retencións aínda alcanzan varios quilómetros no paso cara a Francia
![Tractores este luns na AP-7 (EFE/David Borrat)](https://img-g24-crtvg.flumotion.com/prog24/2024/20240604/tractores-jonquera-Francia-EFEDavidBorrat-040624.jpg)
Os agricultores e gandeiros convocantes dos cortes nos diferentes pasos fronteirizos con Francia que se mantiveron durante 24 horas deron este martes por finalizada a protesta, que cualifican de "histórica" e que segue xerando retencións nalgunhas vías afectadas.
O portavoz da Revolta Pagesa, Eduard Escolà, explicou a EFE que están contentos coa mobilización conxunta entre os dous países, que "fixeron o ruído que querían" polo que esperan "que as súas demandas sexan escoitadas proximamente".
O acto, convocado para protestar principalmente polas políticas comunitarias no contexto da celebración esta semana das eleccións ao Parlamento Europeo, contou coa participación de decenas de tractores e persoas a pé en ata oito puntos.
Pedían máis control aos produtos importados, prioridade ás producións locais e reducións fiscais para a produción de alimentos, entre outras.
Tal como anunciaran, os 350 agricultores, segundo cifras do portavoz, levantaron a manifestación ás 10:00 horas desta mañá no paso da AP-7 pola Jonquera e outros contiguos.
Colaboración inédita a ambos os dous lados da fronteira
Da colaboración do sector primario español e francés naceu a Unión de Asociacións do Sector Primario Independente (Unaspi), avanzou Escolà.
O medio cento de tractores que quedaba tras pasar a noite no paso fronteirizo da Jonquera circulaba desde as 10:00 horas a marcha lenta en dirección sur, despois de manter cortada a AP-7 de entrada a España e, en dirección norte, desde o saída número 3 en Llers.
Os técnicos supervisarán a zona antes de reabrir a autoestrada ao tráfico, aínda que os manifestantes abandonaron o punto de concentración sen causar danos como os do pasado febreiro, cando chegaron a furar o asfalto para plantar unha árbore de grandes dimensións.
As protestas noutros dous pasos fronteirizos de Xirona (Mollò e Puigcerdà) e dous de Lleida (A Seu d'Urgell e Bossost) xa finalizaron tamén e as diferentes vías están a reabrirse progresivamente, segundo informa o Servei Català de Trànsit.
A situación en Irún (Guipúscoa) é algo distinta pois, o bloqueo da fronteira nesta zona polas protestas de agricultores aínda xera retencións na AP-8 cun tramo afectado duns dez quilómetros, informou o Departamento vasco de Seguridade.
A mesma fonte precisou que hai zonas nas que o tráfico está totalmente parado e outras nas que hai unha densidade importante de vehículos debido ao bloqueo da fronteira, que aínda non se abriu, aínda que se prevé que se despexará en breve.
As maiores afeccións ao tráfico están a producirse nestes momentos xa que numerosos vehículos pesados están a achegarse á zona para tentar cruzar ao país veciño.
A Revolta Pagesa
A Revolta Pagesa foi capitaneada por ata unha vintena de plataformas independentes, xurdidas á calor das tractoradas de principios de ano, e non contan coa participación das organizacións profesionais agrarias Asaja, COAG e UPA, Unión de Unións e Cooperativas Agro-alimentarias.
Desde o Goberno central, o ministro de Agricultura, Pesca e Alimentación, Luis Planas, manifestou a semana pasada que esta protesta era "marxinal" e, ao seu xuízo, non supoñía unha reactivación das protestas.
Onte, a secretaria de Estado de Agricultura, Begoña García, aseguraba que o Goberno non negociará con organizacións agrarias con representación non acreditada porque "en democracia hai partidos políticos, sindicatos e organizacións agrarias con representatividade".