Os bombeiros de Santiago, entre os dez máis rápidos de Europa na proba Quebra Costas
A competición reuniu en Coímbra 700 bombeiros que correron co equipo ao lombo
O desafío puxo de manifesto a boa forma dos catro efectivos de Santiago, que se presentaban por primeira vez
700 bombeiros europeos puxéronse a proba no desafío Quebra Costas de Coímbra. Unha proba de velocidade durante medio quilómetro de ascenso, cun desnivel do 14 %, 150 chanzos e 22 quilos de equipo ao lombo.
"Hai que correr con todo o traxe, casco, verdugo, luvas e o equipo autónomo de osíxeno", explica Miguel Ángel Arca, xefe de dotación dos Bombeiros de Santiago.
Catro bombeiros do parque de Santiago asumiron o reto de competir por primeira vez. Foi duro, pero deixaron o pavillón ben alto.
"Foi unha carreira moi dura, saímos por idades con intervalos de 15 segundos. Eu saín dos primeiros, case nin me deu tempo a poñerme nervioso. Quedamos moi ben, de décimos de setenta e cinco equipos que competían. Un posto moi bo, e era a primeira vez que iamos", engade o bombeiro.
Entre os dez máis rápidos na categoría de equipos e o segundo posto individual para ese veterano, que con 60 anos amosou estar en plena forma.
"O noso traballo implica subir e baixar pisos, con peso, rescatar persoas, situacións complexas e con moito desgaste. Hai que estar preparados, claro", comenta Miguel Ángel Arca.
Ben adestrados para que un traballo tan esixente non se lles faga costa arriba. Mesmo cando o risco é real, o rival é o lume e a meta salvar vidas.
