Os candidatos á alcaldía de Santiago votaron apelando á participación
Os candidatos á alcaldía de Santiago votaron apelando á participación
Fixeron un chamamento a escoller a "mellor" corporación municipal para os vindeiros catro anos
O socialista Sánchez Bugallo depositaba o seu voto no IES Xelmírez sobre as dez da mañá. O actual alcalde e candidato á reelección facía un chamamento aos composteláns a acudir aos colexios electorais para poder decidir, dixo, o futuro da cidade.
O candidato do PP á alcaldía de Santiago, Borja Verea, votaba no IES Rosalía de Castro sobre as 9:30 da mañá. Verea apelaba tamén á participación para que a cidadanía decida o modelo de cidade que quere para os vindeiros catro anos.
María Rozas, aspirante de Compostela Aberta á alcaldía, foi a máis madrugadora. Depositaba o seu voto arredor das 9:00 da mañá na Facultade de Dereito. Animaba a votar porque, afirmou, a "abstención nunca é positiva" para unha cidade e a súa veciñanza.
A candidata do BNG, Goretti Sanmartín, acudía a votar arroupada por Ana Pontón. Facíao sobre as dez e media na Facultade de Filosofía. Apelou a acadar a maior participación posible para escoller os "mellores" representantes da vindeira corporación municipal.
Todos os candidatos desexaron que a xornada transcorra con normalidade e sen incidencias importantes.
