Os descontos nos carburantes animan o tráfico de portugueses nas gasolineiras da raia
Os descontos nos carburantes animan o tráfico de portugueses nas gasolineiras da raia
Recargar en Galicia suponlles uns 30 céntimos de aforro por litro de combustible
Os condutores portugueses seguen aproveitando o desconto nos carburantes a este lado da raia para cruzar a Galicia e aforrar. Comprobámolo na gasolineira de Feces de Abaixo, na fronteira de Verín: chegan, enchen o depósito e dan a volta, de regreso a Portugal. "Porque aquí é máis barata". "E está cerca, 12 quilómetros". "En Portugal está carísimo, non hai quen aguante cos prezos de alá", comentan.
Pendentes de que o Goberno portugués aplique as rebaixas nos impostos dos carburantes que anunciou a semana pasada, a día de hoxe, aos veciños portugueses cargar aquí, en Galicia, suponlles uns 30 céntimos por litro de aforro, 15 euros por depósito. "A min paréceme moi ben. Se a xente ve que lle compensa, ten que vir. Que se poñan todos de acordo e poñan os impostos todos igual", comenta unha veciña de Verín.
Algúns veñen con garrafas e outros aproveitan para mercar gas, que tamén lles sae máis barato. "Aquí a botella do gas custa 16 ou 17 euros, e en Portugal máis de vinte".
O tráfico de portugueses aquí é constante, xa historicamente, pero os comercios da zona, lamentan, apenas notan os efectos. "Veñen botar gasolina, pero o nivel de compras, moi baixo", di un comerciante que ten o negocio ao lado da gasolineira.