O IPC baixa dúas décimas en xuño ao 3,4% polo abaratamento dos carburantes

O Índice de Prezos de Consumo subiu un 0,3 % en xuño en relación ao mes anterior pero recortou dúas décimas a súa taxa interanual, ata o 3,4 %, segundo os datos avanzados este venres polo Instituto Nacional de Estatística.

O organismo explicou que a moderación do IPC ata o 3,4 % débese ao abaratamento dos carburantes e ao feito de que os prezos dos alimentos subiron en xuño menos que no mesmo mes de 2023.

Por contra, Estatística destaca a influencia á alza no IPC do grupo de lecer e cultura, cuxos prezos subiron este mes máis que en xuño do ano pasado. Co descenso do IPC interanual no sexto mes do ano, a inflación pon fin a tres meses consecutivos de ascensos despois das subidas experimentadas en marzo, abril e maio.

O INE incorpora no avance de datos do IPC unha estimación da inflación subxacente (sen alimentos non elaborados nin produtos enerxéticos), que en xuño se mantivo no 3 %, a mesma taxa que en maio e catro décimas inferior á do IPC xeral.

En termos mensuais (xuño sobre maio), o IPC avanzou tres décimas, rexistrando así o seu sexto incremento mensual consecutivo. O INE publicará os datos definitivos do IPC de xuño o próximo 12 de xullo.