Os Estados Unidos derruban outro obxecto voante, o terceiro en tres días

O Exército de Estados Unidos abateu este domingo un novo obxecto voador non identificado, nesta ocasión mentres sobrevoaba o lago Hurón, no norte do país, segundo adiantou o congresista Jack Bergman e confirmaron fontes gobernamentais ás cadeas CNN e ABC.

Trátase do terceiro "obxecto" neutralizado no últimos tres días en América do Norte, despois do derrubado o venres sobre Alaska e o do sábado no Canadá.

Bergman, a través de Twitter, dixo que mantivera contacto co Departamento de Defensa sobre esta operación na zona dos Grandes Lagos, preto da fronteira canadense, que se coñeceu despois dun peche temporal do espazo aéreo sobre o lago Michigan.

Fontes citadas por The Wall Street Journal sinalan que o obxecto tiña forma octogonal e que voaba a unha altitude duns 20.000 metros, uns 6.100 pés. Non hai indicios de actividade extraterrestre, sinalaron cargos da Administración a medios estadounidenses, quizais por medo a que a sucesión de obxectos voantes non identificados, que xa é tendencia en Twitter, acabe provocando certa psicose na poboación.

A detección e o derrubamento deses tres obxectos chega unha semana despois de que un globo chinés cruzara os Estados Unidos a grande altitude. Segundo o Departamento de Estado, ese globo ía equipado con antenas capaces de detectar e interceptar sinais de comunicacións e outros instrumentos impropios do carácter civil de globo meteorolóxico que lle atribúe a China.

Washington sostén que o globo forma parte dun programa de espionaxe chinesa que sobrevoou máis de 40 países nos cinco continentes. O incidente elevou a tensión diplomática entre as dúas superpotencias.