Os EUA reforzarán a presenza militar en 6 países europeos e na rexión Báltica

Os Estados Unidos anunciaron este mércores que reforzarán a súa presenza militar en seis países europeos -Polonia, Romanía, España, Italia, o Reino Unido e Alemaña-, ademais da rexión Báltica.

A Casa Branca informou nun comunicado de que "aumentará" as despregaduras rotatorias, con blindados, aviación, defensa aérea e forzas de operacións especiais, "para reforzar a seguridade no Báltico".

Washington fixo este anuncio ao comezo do cumio da OTAN en Madrid, onde participa o presidente estadounidense, Joe Biden, quen tamén deu algúns detalles á súa chegada deses reforzos que mandará o seu país a Europa, en resposta á invasión rusa de Ucraína.

Biden anticipou que os EUA van establecer unha base permanente en Polonia, o Corpo Quinto do Exército, e que vai manter as rotacións adicionais de brigadas en chan europeo, que supoñen 5.000 uniformados estadounidenses en Romanía.

Nese sentido, o Goberno dos Estados Unidos precisou que posicionará un equipo de combate de brigada adicional en territorio romanés.

Ademais, os EUA van enviar dous destrutores adicionais a España, á base naval de Rota, o que incrementará a seis o número de embarcacións deste tipo destacadas na devandita base.

No seu comunicado, a Casa Branca detallou que Washington incrementará a presenza de cazabombardeiros de quinta xeración, os máis sofisticados que existen na actualidade, coa localización de dúas escuadróns de F-35 en Lakenheath, no Reino Unido.

En Alemaña, situará unha brigada de artillería de defensa aérea, un batallón de defensa aérea de curto rango e unha brigada de enxeñería cuns 625 soldados en total.

Mentres, en Italia, os EUA posicionarán unha batería de defensas antiaéreas, con 65 militares.