Os fans fixeron noite en Castrelos para conseguir entradas de platea para Aitana

Ás nove da mañá abríanse os despachos para a venda das 4.000 entradas que darán acceso á zona de platea do auditorio de Castrelos para o concerto de Aitana. Iso supuxo vir con tempo para asegurar un bo posto na longa ringleira de aspirantes. Os primeiros chegaron o xoves a mediodía. Cun tempo tan bo, moitos equiparan a experiencia de pasar a noite no parque con estar na praia ou nun campamento de verán.

Os que non facían un balance tan positivo eran os aspirantes a unha das escasas entradas para persoas con discapacidade, porque só lles reservaron oito, malia que, segundo os que adoitan acudir aos concertos de Castrelos, a plataforma para persoas con mobilidade reducida ten moita máis capacidade. 

Os que lograron entrada para a platea hoxe, amais da experiencia vivida esta noite, teñen moito camiño andado para estar preto de Aitana o próximo 3 de agosto. Ese día abrirase o acceso de balde para a parte das bancadas, pero tamén haberá que ir con tempo para asegurar o pase.