Os fiscais investigados na querela do noivo de Ayuso culpan a García Ortiz da difusión da nota
Os fiscais investigados na querela do noivo de Ayuso culpan a García Ortiz da difusión da nota
Tanto Pilar Rodríguez Fernández, Julián Salto coma Almudena Lastra coinciden na responsabilidade do fiscal xeral do Estado
![](https://img-g24-crtvg.flumotion.com/prog24/2024/20240618/garcia_ortiz.jpg)
A fiscala xefa de Madrid, Pilar Rodríguez Fernández, e o fiscal de Delitos Económicos, Julián Salto, testificaron ante o maxistrado que instrúe a querela de Alberto González Amador contra ambos por un presunto delito de revelación de segredos que a orde directa da emisión da nota aclaratoria da Fiscalía de Madrid correspondeu ao fiscal xeral do Estado, Álvaro García Ortiz.
Ambos declararon este xoves en calidade de investigados na causa que instrúe no Tribunal Superior de Xustiza de Madrid (TSXM) o maxistrado Francisco Goyena en relación á nota aclaratoria da Fiscalía de Madrid sobre as conversacións entre o avogado da parella da presidenta rexional e o fiscal sobre o caso dunha presunta fraude fiscal.
En primeiro lugar declarou Julián Salto Torres, fiscal da Sección de Delitos Económicos da mesma Fiscalía, que respondeu as preguntas formaladas polas partes durante unha hora e dez minutos. Tras un receso de dez minutos compareceu durante algo máis dunha hora María Pilar Rodríguez Fernández, fiscala xefa da Fiscalía Provincial de Madrid.
Ambos coincidiron en responsabilizar ao fiscal xeral do Estado de dar a orde de emitir a nota difundida o pasado 14 de marzo pola Fiscalía de Madrid en que se informaba sobre o intercambio de correos e alegaron que obedeceron ordes para a súa difusión, ao tratarse esta dunha institución xerarquizada.
O propio fiscal xeral do Estado asumiu verbalmente a responsabilidade da difusión da nota de prensa nun acto institucional celebrado na sede da Fiscalía o pasado 15 de abril e posteriormente ratificouno nun escrito dirixido ao TSXM o pasado día 10, no que ademais solicitaba que a causa fose enviada ao Tribunal Supremo.
O pasado 13 de xuño, testificou ante o maxistrado a fiscal superior da Comunidade de Madrid, Almudena Lastra, quen tamén declarou que recibiu a orde directa do fiscal xeral do Estado para difundir a nota aclaratoria sobre as citadas conversacións entre letrado e fiscal. Segundo alegou, a nun principio negouse a difundir o documento ao ser incompatible co deber de confidencialidade.
Porén, o artigo 25 do Estatuto Fiscal, establece que "o fiscal xeral do Estado poderá impartir aos seus subordinados as ordes e instrucións convenientes ao servizo e ao exercicio das funcións, tanto de carácter xeral como referidas a asuntos específicos".
En declaracións aos medios, o decano do Colexio da Avogacía de Madrid, Eugenio Ribón, subliñou que "o segredo profesional é unha pedra angular do exercicio da avogacía" e, aínda que eludiu facer avaliacións sobre as declaracións dos fiscais, recalcou a "firme posición" do colexio para que "as infraccións á confidencialidade non sexan toleradas" e sexan abordadas "coa máxima seriedade". Cabe recordar que esta institución exerce a acusación particular nesta causa.
Na investigación aberta, o maxistrado trata de investigar "quen ou que persoas físicas concretas foron as que interviñeron na decisión de facer público devandito comunicado de prensa e o máximo responsable (en rango) da carreira fiscal que acordou ou deu o visto e prace á decisión de difundir o comunicado".