Os funcionarios de Xustiza aumentarán as medidas de presión

O comité de folga dos funcionarios da administración de Xustiza anunciou este martes en conferencia de prensa seis novas xornadas de paro para aumentar a presión cara ao Ministerio de Xustiza, ao que reclama unha oferta de aumento salarial, e pediu formalmente a dimisión da ministra, Pilar Llop.

Tamén cargan contra o seu equipo ao que acusan de "non ter capacidade de negociación". Son especialmente críticos coa secretaria de Estado deste departamento Tontxu Rodríguez, a quen cualifican de "persoa incendiaria".

Os sindicatos esixen que se recoñezan legal e retributivamente as "funcións reais" dos traballadores dos xulgados e tribunais, así coma un incremento entre 350 e 400 euros anuais para os corpos xerais e especiais, un total de 45.000 persoas, que representan ao 93 por cento do cadro de persoal da administración de Xustiza.

Desde este mércores quedan suspendidos os paros diarios entre as dez da mañá e a unha da tarde que os funcionarios manteñen desde o 17 de abril e, no seu lugar, realizaranse folgas de xornada completa os días 4, 9, 10, 11, 16, 17 e 18 de maio.

Petición de dimisión

Así mesmo, está prevista unha concentración o xoves da próxima semana fronte ao Ministerio. Os sindicatos CSIF, STAJ, CCOO e UXT trasladarán nos próximos días unha "petición formal" de dimisión de Pilar Llop ao presidente do Goberno, Pedro Sánchez, e poñerana en coñecemento dos grupos parlamentarios.

Así o explicou o responsable de Xustiza de CC. OO., Luís Calero, quen acusou o Ministerio de "inutilidade manifesta". A este paro dos funcionarios sumouse a ameaza das últimas horas de xuíces e fiscais de iniciar unha folga indefinida a partir do 16 de maio.