Os incendios no Courel levan queimadas unhas 4.000 hectáreas e 500 veciños desaloxados
Os incendios no Courel levan queimadas unhas 4.000 hectáreas e 500 veciños desaloxados
Activada a situación de emerxencia 2 nos incendios de Vilamor e Seceda en Folgoso, e na parroquia de Saa na Pobra do Brollón
Hai 500 veciños desaloxados porque o lume ameaza os núcleos de poboación, e varias vivendas calcinadas
O vento avivou os incendios en Folgoso do Courel, activos dende a tormenta eléctrica do xoves pasado. Polos datos da última actualización de Medio Rural, hoxe ás 13 horas, o incendio levaba arrasadas máis de 4.000 hectáreas na zona.
En Folgoso hai tres incendios activos: dous na parroquia de Vilamor, con 2.500 e 300 hectáreas queimadas respectivamente; e un en Seceda, que afecta unhas 1.100 hectáreas. Os tres teñen activada a situación de risco 2, de ameaza a núcleos de poboación.
Os desaloxos comezaron xa onte á tarde polo núcleo de Froxán, e logo seguiron en cadea a Vilar, Vilallón, A Campa, Vilamor ou o mesmo núcleo de Folgoso. Cincuenta veciños pasaron a noite no pavillón de Triacastela, e en total hai uns 500 desaloxados na zona e varias casas calcinadas polo lume.
Tamén permanece activa a situación 2 na parroquia de Saa na Pobra do Brollón, con 700 hectáreas arrasadas segundo as últimas estimacións. Hai uns cen veciños desaloxados e dúas casas queimadas que, confirman no concello, eran segundas residencias e estaban deshabitadas.
Medios aéreos e terrestres da Xunta participan nas tarefas de extinción, coa colaboración duns 60 efectivos da UME.
