Os Mossos suspenden dous dos tres axentes detidos por axudar a fuxir a Puigdemont
Os Mossos suspenden dous dos tres axentes detidos por axudar a fuxir a Puigdemont
Os dous mossos foron suspendidos de forma cautelar mentres prosegue a investigación xudicial aberta tras o seu arresto
O maior Josep Lluís Trapero será o director xeral dos Mossos d'Esquadra
A dirección xeral da policía catalá acordou suspender de forma cautelar dous dos tres axentes dos Mossos d'Esquadra detidos por supostamente axudar a fuxir o expresidente catalán Carles Puigdemont tras a súa fugaz reaparición en Barcelona o pasado 8 de agosto.
En rolda de prensa, a conselleira de Interior, Núria Parlon, explicou que ao terceiro mosso detido non lle puideron abrir un expediente disciplinario, a diferenza dos outros dous, porque se atopa de baixa.
Os Mossos detiveron os tres axentes por supostamente prestar protección e axudar a Puigdemont a fuxir de Barcelona o pasado 8 de agosto, a pesar de que sobre el pesaba unha orde de detención emitida polo Tribunal Supremo, aínda que tras pasar a disposición xudicial quedaron en liberdade.
Un dos axentes detidos é o propietario do vehículo co que fuxiu Puigdemont, aínda que no seu caso alegou que lle prestou o coche a unha amiga que vai en cadeira de rodas, que era a muller que conducía cando o expresident logrou fuxir sen ser detido.
No informe que remitiron ao Tribunal Supremo sobre o dispositivo errado para arrestar a Puigdemont, os Mossos admiten que a "manobra de distracción" do expresidente catalán, nun movemento que "escapa a toda lóxica racional ou política", sumiunos nunha situación de "confusión" e "incerteza" que impediu detelo.
