Os pagamentos en efectivo van a menos, e soben os usuarios de tarxetas no móbil

Nin 50 euros en efectivo levamos hoxe no peto. Un informe do Banco de España coloca a media nos 46. Levamos poucos cartos, porque cada vez pagamos menos con eles: os que os usan a diario son un 8 % menos ca en 2023, e hai un 3 % de usuarios que afirman non pagar nunca en efectivo. 

Aínda así, o efectivo segue sendo o medio de pagamento máis frecuente. Úsano sobre todo os homes e as persoas maiores de 55 anos. Segundo ese estudo, as mulleres usan máis as tarxetas, e os mozos e mozas de entre 18 e 34 anos pagan coas tarxetas que levan no móbil. 

Esas carteiras dixitais son o medio de pagamento que máis medra ano a ano: os usuarios frecuentes subiron un 3 %. Din que a razón principal é a comodidade. Dende a asociación Adicae engaden ademais que a tarxeta do móbil é máis segura que a física.

"Non poñemos os datos da tarxeta, fai como unha pantalla" explica Raiza Noguera. "Traballa cun sistema de 'tokenización', o que fai é xerar un 'token' diferente con cada compra. Iso fai a compra un pouco máis segura".

Tamén recomenda usar tarxetas prepago no comercio electrónico ou Bizum para facer transferencias máis seguras entre particulares. E lembra que, igual que cos cartos, o risco cero tampouco existe no dixital.