Os pasaxeiros dun voo de Ryanair estiveron máis de catro horas dentro dun avión na Lavacolla tras impactar nel un raio

Os pasaxeiros do voo de Ryanair con destino a Tenerife Sur que embarcaron ás tres da tarde deste domingo en Santiago de Compostela non puideron desembarcar ata preto das 19:30 no mesmo aeroporto da Lavacolla. Os pasaxeiros, segundo lle contaron á TVG cando estaban aínda dentro do avión, pasaron catro horas  sen comida nin bebida, malia que lla pediron á tripulación e intentaron mercala. Entre os pasaxeiros había varios menores, algún deles aínda bebé.

O avión non puido saír á hora prevista porque lle caeu un raio que impactou nunha á, segundo informou a compañía de baixo custo aos pasaxeiros. Segundo contou aos servizos informativos de Televisión de Galicia una pasaxeira de Santiago de Compostela retida no interior, nese tempo estiveron entrando e saíndo os técnicos e enxeñeiros para revisar as condicións do aparello. Inicialmente, a avaría parecía leve, segundo lles dixeron aos viaxeiros.

A pasaxeira que falou con TVG cando se encontraba no interior do avión relatou que a tripulación, inicialmente, lles ía dicindo que sairían en 20 minutos, despois que en medía hora e que así o tempo se foi alongando ata pasar das catro horas.

Finalmente comezaron a desembarcar pasadas as sete da tarde. A esa hora o ambiente no avión xa estaba tenso e os nenos xa comezaran a chorar e a poñerse nerviosos.

Contra as oito da tarde os pasaxeiros aínda estaban na terminal do aeroporto e sen saber cando e como os ían embarcar con destino a Tenerife.