A familia siria acollida en Galicia é unha nai e os seus catro fillos

A familia refuxiada siria acollida este sábado en Vigo está formada por unha nai e os seus catro fillos, un deles menor de idade. 

Chegaron a Madrid canda 84 compatriotas -trasladados a outras dez provincias españolas-, que primeiro fuxiron da guerra e logo sufriron os terremotos que hai un mes devastaron especialmente a fronteira turca onde vivían refuxiados.

A ONG ACCEM facilitoulle á familia un piso de acollida e vaina asistir en todo o preciso a través do seu equipo multidisciplinar, como explica o seu responsable territorial en Galicia, Daniel Bóveda.

"O principal agora é ver como están a nivel psicolóxico e de saúde xeral e logo ir traballando o castelán e a vía de comunicación e de inclusión. E, unha vez estea isto, atenderemos á formación e mesmo ao traballo".