Moyano asegura que o Cangas viaxa “coa moral polas nubes” á pista do Logroño
Moyano: “É un bo momento para ir xogar a Logroño, unha pista moi difícil e ante un equipo que ocupa unha posición na táboa que non fai xustiza"
Foto Cangas
Nacho Moyano, adestrador do Frigoríficos do Morrazo, manifestou este xoves que o seu equipo viaxa "coa moral polas nubes" á pista do BM Logroño porque o xogo exhibido o pasado sábado ante o Atlético Valladolid foi un apoio para os seus xogadores.
“É un bo momento para ir xogar a Logroño, unha pista moi difícil e ante un equipo que ocupa unha posición na táboa que non fai xustiza ao equipo que ten”, destacou Moyano.
Para o técnico, o seu equipo ten “unha pequena vantaxe” a nivel competitivo porque o conxunto rioxano non xogou a pasada fin de semana.
“É unha pista que non se nos dá moi ben, desde que cheguei a Cangas só fomos capaces de competir de ti a ti no partido que acabamos perdendo por un gol -tempada 2021-22-. Imos con moitas ganas de tentar reverter esa situación”, declarou o preparador do Frigoríficos.
Moyano non esconde que sumar os dous puntos no Palacio dos Deportes da Rioxa permitiría ao seu equipo coller aire na clasificación e distanciarse da pelexa de descenso, a cal esta tempada ve "moi rifada" porque cre que "ningún equipo vai descolgar".
