Partidos e comunidades impaciéntanse por retirar as máscaras

Tras dous anos de pandemia, a retirada das máscaras en interiores centra agora o debate político ante a impaciencia de partidos e gobernos autonómicos por poñer fin á obrigatoriedade xeneralizada en espazos pechados. Esta mesma semana, o Congreso posicionouse a favor e en contra.

O Ministerio de Sanidade e as comunidades celebrarán o vindeiro Consello Interterritorial do Sistema Nacional de Saúde (CISNS) o 6 de abril en Toledo, onde se prevé que se aborde esta cuestión, segundo avanzou o presidente de Castela-A Mancha, Emiliano García-Page, anfitrión do encontro.

Este mércores, o presidente do Goberno, Pedro Sánchez, dixo na sesión de control do Congreso, en resposta a unha pregunta de Ciudadanos, que o Ministerio de Sanidade tomará a decisión "ao segundo seguinte" de que o persoal sanitario o recomende.

Na mesma liña, a ministra de Sanidade, Carolina Darias, non desvelou cando se tomará a decisión, limitouse a defender este venres: "Xa queda menos". Mentres tanto, o Congreso aprobou e rexeitou esta semana dúas propostas sobre este asunto.

Propostas no Congreso

O xoves o pleno da cámara baixa aprobou unha moción de Ciudadanos na que lle pide ao Goberno eliminar o uso da máscara en interiores. Dous días antes, a Comisión de Sanidade rexeitou unha proposición non de lei de Vox que pedía eliminar o uso da máscara en exteriores e interiores, salvo nos espazos sanitarios e sociosanitarios.

O PP posicionouse en contra de ambas as dúas e o PSOE apoiou a iniciativa de Ciudadanos en sintonía con Vox, pero previamente votara en contra da impulsada pola formación de Santiago Abascal.

O debate acelerouse tamén nas comunidades autónomas. En Cataluña, o conselleiro de Saúde da Generalitat, Josep Maria Argimon, dixo que "apertará" de novo o Ministerio para retirar xa as máscaras dentro das aulas escolares e non descartou aplicar esta medida sen o consenso do Goberno central.

Con menos vehemencia, o conselleiro de Saúde de Andalucía, Jesús Aguirre, amosouse partidario de retirar as máscaras nas aulas escolares despois da Semana Santa dado que a incidencia acumulada nas idades da franxa escolar é baixa.