Pecha Galiforest, a feira dos profesionais do monte

Galiforest, a feira do sector forestal de Galicia rematou esta tarde, despois de tres días en que se bateu unha nova marca de visitas, máis de 7.000, e de expositores.  Os profesionais do monte e da madeira coñeceron as últimas tecnoloxías en maquinaria. 

Galicia produce a metade da madeira de toda España e temos 25.000 postos de traballo vinculados ao sector, que está en crecemento.

Cun 75 % do terreo do país a monte esta exposición, de 14.000 metros no Centro de Formación de Sergude, en Boqueixón, é unha pequena mostra do futuro forestal,  na que se concentra a maquinaria máis novidosa que nos próximos meses estará  no monte. Así o recoñecía Ricardo José Durán Rodríguez, Director Xeral da Semana Verde de Galicia.

"Digamos que aquí veñen profesionais de todas as partes de España e Portugal para informarse de que é o que ofrece o mercado. Poder ver nas demostracións como funciona cada máquina e poder escoller con coñecemento de causa directo".

Demostracións coma esta, dunha fresadora que deixa o terreo listo para a sementeira, como amosaba Juan Díaz, de Agroforestal Rouco.

"Vai ser moi importante o seu traballo porque é unha maneira de profundar para pasar terreos forestais a incluso terreos agrícolas, e que nunha pasada consigamos desbrozar o que hai no monte e consigamos facer pasto ou terreo agrícola".

Mentres, o traballo a machado queda para a competición, nun deporte no que falta aínda campións galegos.

"Traemos o Sthil Timbersports que é un deporte a nivel internacional, onde se compite e como estades a ver temos varias probas de cortes en vertical, en horizontal e vertical en altura. É un deporte que a nivel internacional é moi coñecido", di Javier, da empresa Stihl.

Despois de catro anos sen feira, a organización xa ten a vista posta na próxima edición.