Pepe Álvarez: "O SMI ten que subir con carácter retroactivo desde o 1 de xaneiro"

O secretario xeral de UGT puxo en valor a negociación co Goberno sobre a suba das pensións, que supuxo substituír a fórmula que calcula a súa revalorización: "Volvemos ao sistema anterior, previo a que o Goberno de Rajoy recortase de maneira drástica tanto a suba das pensións como o acceso para os futuros pensionistas, iso desapareceu". 

Nunha entrevista no Galicia por diante, Álvarez apuntou que aínda hai marxe de mellora: "É verdade que, polo método de cálculo, a revalorización sae máis baixa que a suba do IPC, pero iso queda pendente para o ano que vén". O secretario xeral do sindicato tamén destacou que é necesaria unha suba maior das pensións mínimas, pero lembra que iso non depende da negociación cos axentes sociais, senón do propio sistema de pensións vixente.

Álvarez tamén se referiu á suba pendente do SMI: "Ten que subir con carácter retroactivo desde o 1 de xaneiro. Non só porque é de xustiza, senón porque o IPC está disparado", dixo. Sobre as avaliacións dalgúns organismos económicos que cuestionan que sexa o momento de aprobar esa suba, Álvarez apuntou: "As autoridades económicas téñennos afeitos a que sempre que se trata de subir os salarios non están de acordo. Non hai razóns económicas para non facelo: a suba do SMI non destrúe emprego, ao contrario, crea emprego".

Sobre a reforma laboral pactada cos axentes sociais e a posibilidade de que se introduzan cambios durante a tramitación parlamentaria, como a prevalencia dos convenios autonómicos, Álvarez opinou que "os temas que non foron obxecto de negociación na Mesa de diálogo social non deben de incluírse".