Pídenlle ao ADIF que retire pezas dun tren que descarrilara en Vilamartín de Valdeorras
Pídenlle ao ADIF que retire pezas dun tren que descarrilara en Vilamartín de Valdeorras
O sinistro produciuse o mes de agosto pasado e desde aquela restos do descarrilamento seguen no lugar e, segundo os veciños, é un perigo
O pasado mes de agosto producírase un descarrilamento de cinco vagóns dun tren de mercadorías na vía que atravesa o concello ourensán de Vilamartín de Valdeorras. Pois desde aquela, cinco meses despois, aínda hai restos e pezas do convoi na estrada paralela á vía. O Concello e tamén os veciños pídenlle ao Adif que retire ese material, porque din é un perigo para a circulación e ademais dá mala imaxe.
A carón da vía ferroviaria seguen os restos de pezas do tren de mercadorías que descarrilara o pasado 23 de agosto neste punto no municipio ourensán de Vilamartín de Valdeorras. A veciñanza di que é un perigo e pídelle ao Adif que retire o material metálico.
Por seguridade, xa que o descarrilamento de cinco vagóns tamén provocou fochancas nesta estrada. Pero ademais, aseguran os veciños que dá moi mala imaxe na zona onde hai unha área recreativa.
Desde o Concello de Vilamartín de Valdeorras xa enviaron tres escritos ao Adif solicitando a retirada dos restos do tren sinistrado, pero por agora aínda non recibiron resposta.
