Podemos Fuenlabrada comeza un peche contra a imposición dunha alianza con IU

A 48 horas de que se cumpra o prazo de presentación de candidaturas electorais, aumentan os problemas para Podemos cun novo encerro, que se suma ao que mantén desde o xoves a cabeza de lista de Asturias. Membros do círculo de Fuenlabrada pecháronse este sábado en protesta pola imposición dunha alianza electoral con IU, non avalada polos militantes.

Explican que tomaron a decisión para reivindicar a vontade da militancia e tras agardar unha semana por unha resposta da dirección autonómica. Aseguran que aínda hai tempo para reverter a coalición con IU que impuxo a dirección rexional e que non é avalada polos inscritos.

"O prazo para inscribilas é ata as 23:59 do luns 24 e nós o que queremos é que nos expliquen que candidatura é por que ata o momento non sabemos, comunicáronnos que a encabezaría unha persoa de IU pero descoñecemos os termos da negociación, que nos expliquen iso e despois que dean marcha atrás".

Na sede de Xixón, a candidata de Podemos continúa o encerro que comezou o xoves canda outros compañeiros para esixir que a dirección do partido respecte a lista electoral votada por máis do 60 por cento dos militantes. Covadonga Tomé denunciou o intento da dirección rexional de substituír o número 4 da candidatura, do sector crítico, pola actual voceira do partido en Asturias.

"Insistimos na nosa petición a Ione Belarra de que non deixe tirada a candidatura de Asturias que, ao final, é o reflexo das candidaturas de toda España"

A secretaria de organización de Podemos, Lilith Vestringe, asegura que hai comunicación con Fuenlabrada, que se buscaron acordos xustos e que seguirán traballando con rigor para asegurar a unidade.