Podemos pide ao xuíz investigar os audios de Villarejo con Cospedal e Ferreras

Podemos pediu ao xuíz da Audiencia Nacional Manuel García Castellón que investigue os audios publicados con conversas entre o excomisario José Manuel Villarejo e a exsecretaria xeral do Partido Popular María Dolores de Cospedal, nas que supostamente conspiraban contra a formación morada.

Nun escrito presentado no Xulgado, Podemos solicita ao maxistrado, que instrúe o caso Kitchen seguido por unha presunta espionaxe ao extesoureiro do PP Luis Bárcenas no que a formación  exerce a acusación popular, a incorporación á causa das conversas publicadas recentemente entre Villarejo e Cospedal e entre o excomisario e o xornalista Antonio García Ferreras.

Segundo publicou o pasado día 7 o xornal El País, en maio de 2017 Villarejo mantivo unha conversa coa daquela secretaria xeral do PP María Dolores de Cospedal en que aseguraba ter "un tema da hostia contra Podemos", ao que a ministra de Defensa lle respondía: "Iso é unha bomba. Eu quéroo".

Villarejo contoulle: "Tiña un coronel do servizo secreto venezolano que me ía dar unhas actas onde había reunións de ETA co servizo secreto cubano e cos de Podemos en Venezuela!". Cospedal dille: "Foder, iso é unha bomba!", segundo a citada publicación.

No seu escrito, Podemos pide ao xuíz que aclare por que ese material non foi incorporado ao sumario a pesar da "evidente relevancia para o obxecto da investigación" e se hai máis gravacións de igual importancia que estean en posesión da unidade de apoio policial ao Xulgado.

En declaracións aos xornalistas, o portavoz parlamentario de Unidas Podemos Pablo Echenique sinalou que piden unha explicación a García Castellón, máxime cando "como todo o mundo sabe, o xuíz permitiu que Cospedal se zafe" e agora coñécense uns audios seus co excomisario que, segundo asegurou, foran intervidos pola Policía e que a implican "nunha trama mafiosa".

Para Echenique, ten "mala traza" que non se incorporasen á causa eses audios nin tampouco os de Ferreras.

"Creo que non fai falta ser xuíz ou policía para darse conta de que isto debería ter interese na causa, e, con todo, non se incorporaron", observou.