Polo menos quince mortos nunha avalancha en Quetame, no centro de Colombia
Polo menos quince mortos nunha avalancha en Quetame, no centro de Colombia
Entre os falecidos hai tres menores de idade. As familias afectadas iran a un albergue
Vinte vivendas desaparecidas baixo as toneladas de lama que deixou a avalancha
A cifra de vítimas por unha avalancha de barro e auga ocorrida na localidade de Quetame, no departamento colombiano de Cundinamarca, situado no centro do país, ascendeu a 15 falecidos, ademais de seis feridos e varios desaparecidos.
As autoridades declararon "a calamidade pública e a urxencia para dispoñer dos recursos de maneira inmediata para atender as vítimas, as familias e o municipio de Quetame", engadiu o gobernador da rexión Nicolás García.
"Desde a 1:30 da mañá traballamos no Posto de Mando Unificado (PMU) para atender a emerxencia no municipio de Quetame. A esta hora xa son 14 os corpos achados sen vida, seis as persoas achadas con vida e remitidas a postos de saúde e hospitais da provincia e do departamento do Meta e Villavicencio", informou García.
As fortes choivas provocaron o desbordamento de dous cavorcos na madrugada do martes que arrasaron parte do casarío de Naranjal, situado na zona rural de Quetame.
O director xeral da Unidade Nacional para a Xestión do Risco de Desastres (UNGRD), Olmedo López, detallou que entre os falecidos hai tres menores de idade e que as familias afectadas serán conducidas a un albergue temporalmente para ser asentadas posteriormente noutro lugar.
"Era unha comunidade pequena", dixo o funcionario, quen engadiu que, segundo datos da Alcaldía de Quetame,, "son 20 vivendas desaparecidas" baixo as toneladas de lama que deixou a avalancha.
Segundo as autoridades, a avalancha arrastrou ademais unha ponte, o cal ocasionou o peche da estrada que vai de Bogotá a Villavicencio, capital do departamento do Meta e unha das despensas agrícolas do país.
