Portugal adxudica as obras do primeiro tramo de alta velocidade entre O Porto e Lisboa

O Goberno de Portugal anunciou este xoves a adxudicación das obras da primeira fase para construír a liña ferroviaria de alta velocidade entre O Porto e Lisboa.

Este primeiro tramo foi adxudicado ao consorcio denominado LusoLav, liderado pola construtora lusa Mota Engil, segundo un comunicado do Executivo luso difundido este xoves.

Esta primeira fase comprende algo menos de 80 quilómetros entre O Porto e a estación de Oiã, situada na rexión de Aveiro, do total de 290 quilómetros que se construirán entre O Porto e Lisboa.

En principio, as obras da primeira fase estarán concluídas ao longo do ano 2028.

O primeiro ministro de Portugal, Luís Montenegro, dixo en Lisboa durante a cerimonia para a adxudicación das obras que o seu gabinete ten intención de acelerar todo o relativo ás conexións ferroviarias de alta velocidade.

A segunda fase das obras da alta velocidade entre O Porto e Lisboa, aínda sen adxudicar, estenderanse ata a estación de Carregado, ao norte da rexión de Lisboa, e, en principio, poderían estar finalizadas en 2030.

A última fase conclúe na capital portuguesa, aínda sen prazos, para completar os 290 quilómetros que lle separan do Porto.

O obxectivo é que este tramo de alta velocidade sirva para que a viaxe se poida realizar nun tempo dunha hora e cuarto, fronte ás máis de 4 horas que dura actualmente o traxecto entre as dúas cidades.