O Goberno portugués dá por feita a transmisión comunitaria da variante ómicron
O Goberno portugués dá por feita a transmisión comunitaria da variante ómicron
Calculan que o 10 % dos novos positivos son da nova variante
A velocidade dos contaxios obriga a acelerar a vacinación
Varias persoas fan fila este mércores nun posto de tests de antíxenos gratuítos no centro do Porto
As autoridades portuguesas recoñeceron este mércores que a transmisión da nova variante ómicron xa é comunitaria no país. Detectaron varios infectados que non tiñan relación con outros positivos ou gromos que estaban sendo especialmente vixiados.
A Dirección Xeral da Saúde recoñece que non é posible analizar todos os positivos, ao redor de 2.500 cada día, para poder determinar se pertencen ou non á cepa ómicron. De todas formas, calculan que representaría agora mesmo ao redor do 10% de todos os casos detectados.
As autoridades concordan coa Organización Mundial da Saúde e tamén calculan que nos vindeiros días a expansión da nova variante acabará estendéndose a unha velocidade nunca vista na pandemia.
É por isto que Portugal está acelerando os procesos de vacinación da terceira dose e tamén dos menores de 12 anos. Agora mesmo xa é posible pedir cita telemática para os nenos de 9 anos e os maiores de 60. Nos vindeiros días estará tamén dispoñible para os maiores de 50.
O Goberno luso non pensa aumentar as restricións con vistas ao Nadal aínda que si lle pide á poboación responsabilidade. Din que as medidas adoptadas hai 15 días están funcionando: esta semana hase chegar ao pico da quinta vaga, o numero de positivos diarios está á baixa e os hospitais non sofren presión asistencial.
